«الماتىدا نە بولدى؟ ادام نانعىسىز سويقان بولدى. كوپتىڭ كولەڭكەسىنە تىعىلعان سودىرتەكتەستەر، ادام كەيپىندە ەسىرگەن، ەلىرگەن، بۇقپانتايلاعان ايۋاندار بۇزىق ويلارىن ىسكە اسىردى. «ادام الاسى ىشىندە» دەگەندەي، قىلمىستىق توبىر لاڭ سالدى. قيراتۋدان، جايراتۋدان باستاپ، كىسى ساباۋ، وزگەنىڭ مەنشىگىنە قول سالۋ، بىرەۋدىڭ مۇلكىن توناۋ، ورتەۋ، كوزگە تۇسكەن كۇللى دۇنيەنىڭ كۇلىن كوككە ۇشىرۋ اگرەسسيانىڭ ارانىن اشىپ كورسەتتى. سوعىستا ەمەس، بەيبىت كۇندە كوز جۇمۋ، ءزابىر كورىپ، زارداپ شەگۋ، ءبۇتىندى ءبۇلدىرۋ، قاراقشىلىققا بارۋ - ناعىز قىلمىس، كەشىرىلمەيتىن كۇنا. قۇدايدىڭ الدىندا كۇناھارلىق جاساپ، قاراپايىم ادامداردىڭ نالاسىنا قالدى. جەلىلەردە، تەلەارنالاردا كورسەتىلگەندەي، ار سوتى اراشالاي المايتىن ارسىزدىق، ارانداتۋشىلىق ورىن الدى. توتەننەن، بوتەننەن كەلگەنگە قارسى تۇرار توسقاۋىل بىردەن تابىلا كەتپەگەنى دە ءتۇرلى ويعا قالدىرعانى جاسىرىن ەمەس»، دەيدى دەپۋتات.
سونىمەن قاتار، ول قالىپتاسقان جاعدايدى دەر كەزىندە باقىلاۋىنا العان ەل پرەزيدەنتىنىڭ ارەكەتىنە توقتالىپ، كونستيتۋتسيالىق قۇزىرەتكە ساي شەشىمدەر قابىلدانعانىن اتاپ ءوتتى.
«ەل تاريحىندا بۇرىن-سوڭدى بولماعان تۇبەگەيلى باتىل قادامدى حالىق بىردەن قولدادى. ەلىمىزدىڭ تۇتاستىعى، حالقىمىزدىڭ تاعدىرى، بەيبىت ادامدار ءومىرىنىڭ قاۋىپسىزدىگى قىل ۇستىندە تۇرعانىن ەسكەرتە كەلىپ، مەملەكەت باسشىسى قازاقستاننىڭ بولاشاعى ءۇشىن باسىن بايگەگە تىگۋگە دايىن ەكەنىن مالىمدەدى. توتەنشە جاعداي جاريالاپ، اسكەري جانە قۇقىق قورعاۋشى ازاماتتاردىڭ وتانسۇيەر ىستەرىنە باعا بەرىپ، ولاردى مورالدىق جاعىنان مىقتى بولۋعا جىگەرلەندىردى. شەتەلدە ارنايى دايىندالعان ەلبۇزارلار تاراپىنان جاسالعان شابۋىل اگرەسسيالىق اكت ەكەندىگى دە انىق ايتىلدى. ءيا، وزدەرىنىڭ وتانى جوق قاسكويلەردىڭ اياۋشىلىق سەزىمىنەن جۇرداي بولاتىنى بەلگىلى. سوندىقتان ولاردى دا اياۋعا بولماس. بەيبىت ءومىردى قالپىنا كەلتىرۋ ءدال بۇگىندە ءاربىر لاۋازىمدى تۇلعانىڭ، مەملەكەتتىك قىزمەتشىنىڭ، ءار تۇرعىننىڭ، ازاماتتىڭ جاۋاپكەرشىلىگىنە بايلانىستى. بۇل حالىقتىڭ ورتاق تالابى، شىنايى تىلەگى»، - دەيدى دارحان مىڭباي.