ق ر پارلامەنتى سەناتىنىڭ ءتوراعاسى ماۋلەن اشىمبايەۆ وسىنداي پىكىر ءبىلدىردى.
«ەلدەگى احۋال ءبارىمىزدى الاڭداتىپ وتىر. جاعدايدى تۇراقتاندىرۋ ءۇشىن مەملەكەت تاراپىنان جەدەل شارالار قابىلدانۋدا. پرەزيدەنتىمىز قاسىم-جومارت كەمەل ۇلى توقايەۆ ءتيىستى مەملەكەتتىك ورگاندارعا ءبىرقاتار شۇعىل تاپسىرما بەردى. كەشە كەشكىسىن مەملەكەت باسشىسى قاۋىپسىزدىك كەڭەسىنىڭ ءتوراعاسى رەتىندە كەڭەستىڭ وتىرىسىن وتكىزدى. جيىندا ەلىمىزدىڭ تۇراقتىلىعىنا قاۋىپ توندىرگەن تەرروريستىك جانە قىلمىستىق ارەكەتتەرمەن كۇرەس ماسەلەلەرى تالقىلاندى.
وكىنىشكە قاراي، ەلىمىزدىڭ ءبىرقاتار وڭىرىندە، اسىرەسە، الماتى قالاسىندا وزدەرىن ەرەۋىلشىلەر دەپ اتايتىن ارانداتۋشىلار توبى قاساقانا ارەكەتتەرگە بارۋدا. ولاردىڭ اكىمدىكتەرگە، الەۋمەتتىك جانە ينفراقۇرىلىمدىق نىساندارعا شابۋىل ۇيىمداستىرعانى بەلگىلى. جەدەل جاردەم كولىگىنىڭ جولىن بوگەگەن جانە ءتارتىپ ساقشىلارىنا كۇش قولدانعان جاعدايلار دا تىركەلدى. دۇكەندەردى قيراتۋ، توناۋ، مارودەرلىككە بارۋ وقيعالارى بەلەڭ الدى. مۇنداي ارەكەتتەر ىشكى جاعدايدى ودان ءارى ۋشىقتىرۋدى كوزدەيتىنى تۇسىنىكتى. بۇل - پرەزيدەنتىمىز ايتقانداي، قاسكويلەردىڭ جان-جاقتى ويلاستىرىلعان تەرروريستىك ءىس-ارەكەتى»، - دەيدى جوعارى پالاتانىڭ ءتوراعاسى.
سونداي-اق، ماۋلەن اشىمبايەۆ وسىنداي سىن ساعاتتا ءبىزدىڭ باستى مىندەتىمىز تاۋەلسىزدىكتى جانە مەملەكەتتىلىكتى ساقتاۋ ەكەنىن، بارشا قازاقستاندىق وسى جولدا جۇدىرىقتاي جۇمىلۋعا تيىستىگىن، ەڭ باستىسى، ارانداتۋشىلاردىڭ ايتاعىنا ەرمەۋ كەرەكتىگىن اتاپ ءوتتى.
«ارانداتۋعا ەرۋ ەشقانداي جاقسىلىققا اكەلمەيدى. وعان الىستان مىسال ىزدەۋدىڭ قاجەتى جوق. كەيبىر كورشى مەملەكەتتەردە بولعان جاعدايدان، ولاردىڭ تۇتاستىعىنا كەلگەن نۇقسان مەن ەكونوميكالىق زاردابىنان ساباق العانىمىز ءجون. سوندىقتان ەل ىشىنە ىرىتكى سالۋشىلاردىڭ سوزىنە ەرىپ، ەلدىگىمىزگە سىزات تۇسىرمەيىك. ءوز بولاشاعىمىزعا بالتا شاپپايىق.
ەل دە، جەر دە وزىمىزدىكى. بۇل - بىزگە بابادان قالعان امانات. ەندى سونى ساقتاپ، كەلەر بۋىنعا جەتكىزۋىمىز قاجەت. ول ءۇشىن مەملەكەتتىلىكتى بارىنەن بيىك قويۋىمىز كەرەك. سوندىقتان بىرلىگىمىزدى بەكەمدەي تۇسەيىك، بەرەكەمىزدى قاشىرمايىق. وسىنداي كۇردەلى كەزەڭدە ەلدىڭ تۇراقتىلىعى مەن تۇتاستىعىن ساقتاۋ ءۇشىن پرەزيدەنتىمىزگە قولداۋ ءبىلدىرىپ، ەلدىگىمىز بەن بىرلىگىمىزدى كورسەتەيىك»، - دەپ ءتۇيدى ءسوزىن ول.