«ماڭعىستاۋ وبلىسىنداعى جانارماي ستانسالارىنىڭ يەلەرى سۇيىتىلعان مۇناي گازىنىڭ باعاسىن ليترىنە 85-90 تەڭگەگە دەيىن ءتۇسىرۋ تۋرالى شەشىم قابىلداعانى حابارلاندى. دەگەنمەن باعا قالىپتاسىپ كەتتى عوي. سوندا جانارماي ستانسالارىنىڭ ۇسىنىپ وتىرعان باعاسى قاشانعا دەيىن ساقتالادى. بۇل ءبىر ۋاقىتتىق اكسيا عانا بولىپ قالماي ما؟»، - دەپ سۇرادى ب ا ق وكىلى ورتالىق كوممۋنيكاتسيالار قىزمەتىندە وتكەن بريفينگىدە.
«ءار ءوندىرىستىڭ وزىندىك قۇنى بار. ياعني، جاڭاوزەندە ورنالاسقان «قازاق گاز وڭدەۋ زاۋىتىنىڭ» 1 توننا گازدى ءوندىرۋ قۇنى 98 مىڭ تەڭگە قازىرگى تاڭدا. ونى ليترگە شاققاندا، 60-70 تەڭگە. بۇعان قوساتىن «پەريەۆالكاسى» بار، لوگيستيكاسى بار. سوندىقتان، گازدىڭ وزىندىك قۇنى گاز تاراتۋ ستانسالارىندا شامامەن 80 تەڭگەنى قۇراپ وتىر. ارينە، ونى وزىندىك قۇنىنان تومەن باعاعا ساتۋعا بولمايدى. بۇل تىعىرىققا اپاراتىن جول. سوندىقتان ءبىز سالانى دامىتامىز دەسەك، وسى سالاعا ينۆەستيتسيا اكەلەمىز دەسەك، قولدانىستاعى زاۋىتتاردىڭ قالىپتى جاعدايدا ۇستاپ تۇرامىز دەسەك، ارينە مۇناي گازىنىڭ باعاسىن ارزانداتۋعا بولمايدى»، - دەگەن ۆەدومستۆو باسشىسى.
بۇگىنگى باعا وسى ماسەلە بويىنشا وتەتىن تەكسەرۋدەن كەيىن قايتا ناقتىلاناتىنىن ءتۇسىندىردى. «جانارماي ستانسالارىنىڭ باستاماسى - الەۋمەتتىك باستاما. ياعني، ءوزىنىڭ مارجاسىمەن ءبولىسىپ، 100-120 تەڭگەدەن 85-90 تەڭگەگە دەيىن ازايتتى. ءبىز وسىنداي باستامانى تەك قولداۋىمىز كەرەك. بۇل ماسەلە وتە دۇرىس. باسەكەلەستىكتى قورعاۋ جانە دامىتۋ اگەنتتىگىنىڭ وكىلى دە ايتتى. قازىرگى تەكسەرۋ جۇمىستارى جۇرگىزىلىپ، باعانىڭ ءوزىن اقتاۋ دەڭگەيىن انىقتاپ، ناقتى شەشىمگە كەلەدى دەپ ويلايمىن»، - دەدى ماعزۇم مىرزاعاليەۆ.
اۆتور: ەسىمجان ناقتىباي