ورتالىق كوممۋنيكاتسيالار قىزمەتىندە وتكەن بريفينگىدە ق ر باسەكەلەستىكتى قورعاۋ جانە دامىتۋ اگەنتتىگىنىڭ وتىن- ەنەرگەتيكا ونەركاسىبى دەپارتامەنتى باسقارماسىنىڭ باسشىسى قۋات اسامبەكوۆ سۇيىتىلعان گاز باعاسىنىڭ نارىعىندا قالىپتاسقان جاعدايعا بايلانىستى بىرنەشە وبلىستا تەرگەۋ باستالعانىن ءمالىم ەتتى.
«اگەنتتىك ءوز تاراپىنان وسى جاعداي بويىنشا تالداۋ جاسادى. قازىرگى تاڭدا ماڭعىستاۋ وبلىسىندا باعانى كەلسۋ بويىنشا، كارتەلدىك كەلىسىم بويىنشا تەرگەۋ باستالدى. تاعى دا باسقا قوستاناي مەن سولتۇستىك قازاقستان وبلىستارى بويىنشا تەرگەۋلەر جۇرگىزىلىپ جاتىر. تەرگەۋ جاقىندا باستالعانىنا بايلانىستى قازىر قورىتىندى تۋرالى ايتۋ ەرتە. ءبىرشاما ۋاقىت كەرەك بولادى»، - دەدى اگەنتتىك وكىلى.
ەسكە سالساق، مەملەكەت باسشىسى قاسىم- جومارت توقايەۆ Twitter- دەگى سۇيىتىلعان گاز باعاسىنان باستالعان پاراقشاسىندا جاڭاوزەندەگى جاعدايعا قاتىستى جازبا جاريالاعان بولاتىن.
«ۇكىمەتكە جاڭاوزەندەگى جاعدايدى ەكونوميكالىق تۇرعىدان ەسكەرىپ، قۇقىقتىق جاعىنان تەز ارادا قاراستىرۋدى تاپسىردىم. شەرۋگە شىققاندار قوعامدىق ءتارتىپتى بۇزباۋى ءتيىس. ازاماتتاردىڭ جەرگىلىكتى جانە ورتالىق بيلىك ورگاندارىنا تالابىن اشىق ايتۋعا قۇقىعى بار، ءبىراق، بۇل زاڭعا، ناقتىراق ايتقاندا، بەيبىت شەرۋلەر تۋرالى زاڭعا سايكەس جۇزەگە اسىرىلۋى كەرەك»، دەلىنگەن جازبادا.
ال ق ر پرەمەر- ءمينيسترىنىڭ رەسمي سايتى ماڭعىستاۋ وبلىسىنداعى جانارماي ستانسالارىنىڭ يەلەرى سۇيىتىلعان مۇناي گازىنىڭ قۇنىن ليترىنە 120 تەڭگەدەن 85-90 تەڭگەگە دەيىن تومەندەتۋ تۋرالى شەشىم قابىلداعانىن جازدى.
ءماجىلىس دەپۋتاتى ەرلان سايروۆ ۇكىمەت باعا دالىزدەرىن بەلگىلەۋ ارقىلى باعانىڭ ۇزاق مەرزىمدى تۇراقتىلىعىن قامتاماسىز ەتەتىنىن ايتىپ، حالىقتى سابىرعا شاقىردى.