- سۇيىتىلعان گاز باعاسىنىڭ قىمباتتاۋىنا نە سەبەپ بولدى؟
- 2022 -جىلعى 1- قاڭتاردان باستاپ سۇيىتىلعان گاز وندىرۋشىلەر مۇناي ونىمدەرىن % 100 ەلەكتروندى ساۋدا ارقىلى ساتۋعا كوشتى. بۇل رەتتە رەسپۋبليكا بويىنشا گازدىڭ ورتاشا باعاسى ليترىنە 110 تەڭگەنى، كورشىلەس اتىراۋ وبلىسىندا - 115 تەڭگەنى نەمەسە ورالدا - 120 تەڭگەنى قۇرايدى. قازىرگى ۋاقىتتا وبلىس بويىنشا اقىرعى تۇتىنۋشىعا دەيىنگى گاز باعاسى 95-تەن 115 تەڭگەگە دەيىن اۋىتقىپ تۇر.
- بۇرىن گاز باعاسى 60 تەڭگە بولاتىن. بۇل باعا قايتا ورالۋى مۇمكىن بە، اكىمدىك گاز باعاسىن رەتتەۋمەن اينالىسا ما؟
- 60 تەڭگە مولشەرىندەگى بۇرىنعى باعا ەندى بولمايدى، ويتكەنى قازىر بيرجاداعى گازدىڭ باعاسى تاسىمالداۋ جانە كاسىپكەردىڭ وپەراتسيالىق شىعىستارىن ەسەپكە الماعاندا ليترىنە 70-85 تەڭگەنى كورسەتىپ تۇر. تۇتاستاي العاندا، گازدىڭ باعاسىن نارىقتىڭ ءوزى سۇرانىس پەن ۇسىنىسقا قاراي قالىپتاستىراتىن بولادى. اكىمدىك گاز باعاسىن رەتتەۋگە قاتىسپايدى، ويتكەنى بۇل تاۋار باسەكەلەستىك ورتاعا تيەسىلى. دەگەنمەن، جەكە كاسىپكەرلەر تاراپىنان باعانى نەگىزسىز كوتەرۋ فاكتىلەرى تۋىنداعان جاعدايدا ق ر باسەكەلەستىكتى قورعاۋ اگەنتتىگىنىڭ دەپارتامەنتى اكىمشىلىك شارالار قابىلدايدى.
- جاڭاوزەندە سۇيىتىلعان گاز وندىرەتىن زاۋىت بار. نەلىكتەن زاۋىت ونىمدەرى وڭىرگە جەتپەي وتىر؟
- وبلىستا 1973 -جىلدان بەرى گاز وندىرەتىن جالعىز كاسىپورىن - قازاق گاز وڭدەۋ زاۋىتى. ول ايىنا 14,5 مىڭ توننا سۇيىتىلعان گاز وندىرەدى. الايدا، وبلىستىڭ تۇتىنۋ كولەمى 18 مىڭ تونناعا جەتكەندىكتەن، زاۋىت ءوڭىر قاجەتتىلىگىن تولىق وتەي المايدى. سوندىقتان باسقا وڭىرلەردەن قوسىمشا 3,5 مىڭ توننا گاز جەتكىزىلەدى. بۇگىنگى تاڭدا قازاق گاز وڭدەۋ زاۋىتىنىڭ نەگىزگى جابدىقتارى % 90- عا توزعان. ەگەر شۇعىل شارالار قولدانىلماسا، الداعى ۋاقىتتا زاۋىت توقتاپ، سۇيىتىلعان گاز تاپشىلىعى بولۋى مۇمكىن. سۇيىتىلعان گازدى ءوز نارىقتىق باعاسىنا وتكىزۋدىڭ ارقاسىندا جاڭا زاۋىت سالۋ جوسپارلانۋدا.
اۆتور: ايجان سەرىكجان قىزى