«1 - قاڭتاردان باستاپ 30 - ماۋسىمعا دەيىن سوزىلاتىن ءتوراعالىعىمىزدىڭ ماقساتىنا كەلەر بولساق، ءوز شەكاراسى اۋماعىندا قىزمەت ەتەتىن ەۋروپادان تولىعىمەن تاۋەلسىز، ءوز تاعدىرىنا ءوزى باسشىلىق ەتەتىن مىقتى ەۋروپاعا اينالۋ»، - دەدى فرانسيا پرەزيدەنتى ەممانۋەل ماكرون.
فرانسيا پرەزيدەنتىنىڭ ويىنشا، اتالعان ەگەمەندىككە شەنگەن اۋماعىنىڭ رەفورماسى ارقىلى جەتۋ كەرەك.
«بىرىنشىدەن، شەنگەندى ساياسي باسقارۋدى بەكىتۋ كەرەك. ەكىنشىدەن، شەكاراداعى داعدارىس جاعدايىندا جەدەل قولداۋ كورسەتۋ تەتىكتەرىن ويلاستىرۋ كەرەك»، - دەدى ول.
ەممانۋەل ماكرون كوروناۆيرۋس پاندەمياسى تۋدىرعان ەكونوميكالىق داعدارىسپەن كۇرەسۋ بويىنشا ارىپتەستەرىنىڭ ارەكەتتەرىن ۇيلەستىرىپ وتىرۋى ءتيىس. ادامداردىڭ جاعدايىن ەسكەرە وتىرىپ، ونىڭ الەۋمەتتىك شارالارعا باسا نازار اۋدارعىسى كەلەدى. ناۋرىز ايىندا دامۋدىڭ جاڭا مودەلىن تالقىلاۋ ءۇشىن قوسىمشا سامميت وتپەك. ماكرون ە و- عا مۇشە بارلىق ەلدەر ءۇشىن بىردەي تومەنگى جالاقى مولشەرىن ەنگىزۋگە تىرىساتىن بولادى. سونىمەن قاتار ول جوعارى تەحنولوگيالىق، دەنساۋلىق ساقتاۋ، قورعانىس سالالارىن نىعايتۋدى جانە قورشاعان ورتانى بەلسەندى قورعاۋدى قولدايدى.
پاريج باسقا ەلدەر استانالارىن جاھاندىق كليماتتى قۇتقارۋعا ىنتالاندىرادى. ءبىرىنشى بولىپ كومىرقىشقىل گازىنىڭ شىعارىندىلارىنا سالىق سالۋ ماسەلەسى تالقىلانباق. پرەزيدەنتتىك مەرزىمى اياقتالۋ الدىندا تۇرعان ماكرون نەمىس كانتسلەرىنىڭ قولداۋىن الۋعا نيەتتى.
روبەر شۋمان قورىندا قىزمەت ەتەتىن ەۋروپا تاريحشىسى ەريك مورريس بۇل باعدارلامانىڭ التى ايدان كوپ ۋاقىت الاتىنىن اتاپ ءوتتى.
«ە و كەڭەسىندەگى ءتوراعالىق قىزمەت ونىڭ پرەزيدەنتتىك مەرزىمىنىڭ سوڭىنا كەلىپ وتىر. بۇل - الداعى جىلدارعا يدەيالار قالدىرىپ، ساياسي باعىتتى جاڭارتۋ مەن ەۋروپانى پاندەميادان كەيىن وزگەرۋگە بەرىلگەن مۇمكىندىك. گەرمانياداعى جاڭا ۇكىمەت كەزىندە ەۋروپا جاڭاشا دامۋ باعىتىن الادى»، - دەدى ول.
ە و كەڭەسىنىڭ جۇمىسىنا فرانسياداعى پرەزيدەنتتىك جارىس ءسوزسىز اسەر ەتەدى. ناۋرىزدىڭ اياعى مەن ءساۋىردىڭ اياعىنا دەيىن فرانسۋز ساياساتكەرلەرى ىشكى ساياساتقا كوبىرەك كوڭىل بولەتىن بولادى. الايدا پاريج ديپلوماتتارىنىڭ بريۋسسەلدەگى قىزمەتى بۇرىنعى قارقىنمەن جالعاسپاق.
سونىمەن قاتار فرانتسۋز قوعامىنىڭ نازارى ەل ىشىندەگى جاعدايلارعا قاراي اۋىسادى. وسى جىلدىڭ ورتاسىندا ءتوراعالىق چەح رەسپۋبليكاسىنا وتەدى.