بۇل تۋرالى ق ر قورعانىس ءمينيسترىنىڭ ورىنباسارى دارىن تۇياقوۆ ايتتى، دەپ حابارلايدى قازاقپارات ءتىلشىسى.
ايتا كەتەيىك، بۇگىن پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اسكەري قىزمەت جانە ارناۋلى مەملەكەتتىك ورگاندار قىزمەتكەرلەرى مەن اسكەري قىزمەتشىلەردىڭ تۇرعىن ءۇي قاتىناستارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ماقۇلداندى.
قۇجات اياسىندا مودۋلدى تۇرعىن ءۇي قۇرىلىسى ەسكەرىلگەن.
«بىرىنشىدەن، مودۋلدى تۇرعىن ۇيلەر پايدا بولادى جانە ولار ءتيىستى ستاندارتتارعا سايكەس كەلەدى. وسى نىساندار قىزمەتتىك باسپانا رەتىندى بەرىلەدى، سونداي-اق موبيلدى بولادى. مۇنداي تۇرعىن ۇيلەردى باسقا جەرگە تاسىمالداۋ مۇمكىندىگى جاسالادى. قازىرگى كەزدە تۇرعىن ءۇي قۇرىلىسىندا كوپتەگەن جاڭا تەحنولوگيالار شىعىپ جاتقانىن بىلەسىزدەر. بۇل ۇيلەر تەز سالىناتىن، تاسىمالداناتىن نىساندار جانە ولار ءۇش بولمەلى باسپانا ءۇشىن قاراستىرىلعان بارشا نورمالارعا ساي بولادى. قاجەتتى كوممۋنيكاتسيالارمەن جاساقتالادى»، - دەدى د. تۇياقوۆ ءماجىلىس عيماراتىندا تىلشىلەر ساۋالىنا جاۋاپ بەرە وتىرىپ.
ونىڭ ايتۋىنشا، زاڭ جوباسىندا قاجەتتىلىكتەر اياسىندا قورعانىس مينيسترلىگى وسىنداي مودۋلدى ۇيلەردى اسكەريلەر ءۇشىن ساتىپ الۋى مۇمكىندىگى ەسكەرىلگەن.
«اسكەري قىزمەتشىلەدىڭ ءوزىنىڭ وتباسىمەن بىرگە ءبىر وڭىردەن باسقا وڭىرگە جيناقى عانا قونىس اۋداراتىن جاعدايلار بولادى»، - دەدى ءمينيستردىڭ ورىنباسارى.