كەزدەسۋدە تاراپتار وڭىرلىك جانە حالىقارالىق كۇن تارتىبىندەگى اسا وزەكتى ماسەلەلەر بويىنشا پىكىر الىستى.
ەلباسى رەسەي فەدەراتسياسىنىڭ پرەزيدەنتىنە ت م د- عا مۇشە مەملەكەتتەر كوشباسشىلارىنىڭ بەيرەسمي سامميتىنە جوعارى ەۋرازيالىق ەكونوميكالىق كەڭەستىڭ قۇرمەتتى ءتوراعاسى رەتىندە قاتىسۋعا شاقىرعانى ءۇشىن ريزاشىلىعىن ءبىلدىردى.
«قۇرمەتتى ءتوراعا رەتىندە بۇگىن بەيرەسمي كەزدەسۋگە قاتىسامىن. مەن 1991-جىلعى جەلتوقساندا الماتىدا ت م د- نىڭ قۇرىلۋ ساتىنە كۋا بولعانداردىڭ ءبىرىمىن. بۇل تاريحي وقيعانىڭ قالاي بولعانىن جاقسى بىلەمىن»، - دەدى نۇرسۇلتان نازاربايەۆ.
قازاقستاننىڭ تۇڭعىش پرەزيدەنتى سونداي-اق ەۋرازيا ەكونوميكالىق وداعىن ودان ءارى دامىتۋدىڭ ماڭىزدىلىعىنا توقتالىپ، بۇل ينتەگراتسيالىق بىرلەستىكتىڭ ءتيىمدى ءارى وزەكتى ەكەنىن ايتتى.
«ەۋرازيا ەكونوميكالىق وداعى تولىق قۇرىلدى، وعان كوپشىلىك كوز جەتكىزىپ وتىر. پاندەمياعا قاراماستان تەك قازاقستان مەن رەسەي اراسىنداعى تاۋار اينالىمىنىڭ كولەمى 24 ميللياردتى قۇرايدى. بۇل بۇعان دەيىنگى جىلداردا بولىپ كورمەگەن رەكورد. ءبىزدىڭ مىندەتىمىز - ەۋرازيا ەكونوميكالىق وداعىن دامىتا ءتۇسۋ، قاۋىمداستىرىلعان مۇشەلەر مەن بايقاۋشىلاردى قابىلداۋ. جاڭا مۇشەلەرگە مۇنىڭ ءتيىمدى ەكەنىن دالەلدەۋ. ويتكەنى كونسەنسۋس نەگىزىندە جۇمىس ىستەيتىن بۇل بىرلەستىك ونىڭ بىردە-ءبىر مۇشەلەرىنىڭ قۇقى مەن مۇددەلەرىنە نۇقسان كەلتىرمەيدى»، - دەدى نۇرسۇلتان نازاربايەۆ.
ۆلاديمير پۋتين قازاقستاننىڭ تۇڭعىش پرەزيدەنتىنىڭ ەۋرازيا ەكونوميكالىق وداعىن قۇرۋعا جانە ەۋرازيا قۇرلىعىندا ەكونوميكالىق ينتەگراتسيانى ودان ءارى دامىتۋعا قوسقان ۇلەسىن اتاپ ءوتتى.
«قازىر پاندەمياعا بايلانىستى جاعداي وتە كۇردەلەنىپ، بۇكىل دۇنيە جۇزىندە ءوندىرىس تومەندەگەن تۇستا ءبىزدىڭ وزىڭىزبەن بىرگە جاساعان مەحانيزمدەرىمىز بەن قۇرالدارىمىز ءتيىمدى جۇمىس ىستەپ تۇر. قازاقستانمەن قارىم-قاتىناسىمىزعا توقتالعاندا 2020-جىلى پاندەميا ەڭ كۇشەيگەن كەزەڭدە دە ەكونوميكامىزدىڭ قاتتى قۇلدىراۋىنا جول بەرمەگەنىمىزدى ايتساق جەتكىلىكتى. ال بيىلعى جىلدىڭ العاشقى توعىز ايىندا ءوسۋ كورسەتكىشى 30 پايىزدان استى. ارينە، بۇل قازاقستاننىڭ قازىرگى باسشىلىعىمەن ءبىزدىڭ بىرلەسكەن جۇمىسىمىزدىڭ ماڭىزدى ناتيجەسى»، - دەدى رەسەي فەدەراتسياسىنىڭ پرەزيدەنتى.
ەسكە سالساق، بۇعان دەيىن ق ر تۇڭعىش پرەزيدەنتى-ەلباسى نۇرسۇلتان نازاربايەۆ پەن رەسەي پرەزيدەنتى ۆلاديميرا پۋتين كەزدەسكەنى تۋرالى حابارلادىق.