«ءبىزدىڭ قىزمەتكەرلەر كوشى-قون قىزمەتىن باقىلاۋدى جۇزەگە اسىرۋدا زاڭ نورمالارىن قاتاڭ ۇستانادى. ياعني ەل ازاماتتارىنىڭ عانا ەمەس، سونداي-اق شەتەل ازاماتتارىنىڭ دا قۇقىعى مەن مۇددەسىن قاتار قورعايدى. بۇل قازاقستاندى الەمدىك قوعامداستىقتا قاۋىپسىز اشىق قۇقىقتىق مەملەكەت رەتىندە كورسەتەدى. جانە ەلىمىزدىڭ تۋريستىك ىقپالىن ارتتىرىپ، ينۆەستيتسيا تارتۋ مۇمكىندىگىن كەڭەيتە تۇسەدى. بۇگىندە كوشى-قون پروتسەسى تەز وزگەرىپ وتىرادى. دەگەنمەن ۋاقىتىلى قابىلدانعان قۇقىقتىق-نورماتيۆتىك زاڭناما ونى رەتتەۋگە وڭ سەپتىگىن تيگىزىپ جاتىر. الەمدىك كوشى-قوندا ءبىزدىڭ ەلدىڭ گەوساياسي ماڭىزى ەرەكشە. اسىرەسە ميگرانتتار اعىنى ورتالىق ازيا ەلدەرى، رەسەي مەن قىتايعا تيەسىلى»، - دەدى مۇرات بايمۇقاشيەۆ ق ر پارلامەنتى ماجىلىسىندە جاساعان بايانداماسىندا.
ۆيتسە-ءمينيستردىڭ ايتۋىنشا، كەيبىر شەتەل ازاماتتارى ءۇشىن قازاقستانعا كەلۋگە ۆيزا تالاپ ەتىلەدى.
«بۇگىندە قازاقستان 73 مەملەكەتپەن ۆيزاسىز رەجيم ورناتتى. اتاپ ايتقاندا، 19 مەملەكەتتىڭ ازاماتى ەلىمىزگە جالپى ازاماتتىق ءتولقۇجات ارقىلى كەلە الادى. ونىڭ ىشىندە ەۋرازيالىق ەكونوميكالىق وداق ەلدەرى دە بار. ال 54 مەملەكەتپەن ءبىرجاقتى ءتارتىپتىڭ نەگىزىندە ۆيزاسىز رەجيم ورناتىلدى. ونىڭ قاتارىنا ەكونوميكالىق ىنتىماقتاستىق جانە دامۋ ۇيىمى ەلدەرى جاتادى»، - دەيدى ول.
بۇعان دەيىن مينيستر ورىنباسارى شەتەلدىك ەڭبەك ميگرانتتارى ەسەبىنەن ەل بيۋجەتىنە 30 ميلليارد تەڭگەگە جۋىق قارجى تۇسكەنىن ءمالىم ەتكەن بولاتىن.