قازاقستاندىق ساياحاتشى سەۋلدەن پۋسان قالاسىنا ۆەلوسيپەدپەن جەتپەك
ول العاشقى ساپارىندا باۋىرىمەن بىرگە الماتىدان سەمەيگە جاياۋ ءجۇرىپ بارعان. كەيىن ۆەلوسيپەدكە كوشكەن. بۇگىندە ول ۆەلوسپەدپەن ەلىمىزدىڭ بىرنەشە وڭىرىندە جانە تۇركيادا بولىپ قايتتى. ەندى جول وڭتۇستىك كورەياعا ءتۇسىپ وتىر.
وسى ورايدا قازاقپارات ءتىلشىسى جەرلەسىمىزبەن جاڭا ساپار تۋرالى اڭگىمەلەسكەن ەدى.
«مەن الدىمەن ۆولونتەرمىن. وتكەن جىلى پاندەميادا قالالار جابىلعان كەزدە مەن كىشىگىرىم كوماندا جيناقتاپ، ۆولونتەرلىكپەن اينالىستىم. ءبىزدىڭ كوماندا ىندەت ءورشىپ تۇرعاندا قولداۋعا مۇقتاج جاندارعا ازىق- تۇلىك، كيىم جانە زاتتاي كومەك كورسەتتى. سونداي- اق، ءبىزدىڭ ۆولونتەرلەر قالالىق دەڭگەيدە ۇيىمداستىرىلعان ءتۇرلى قايىرىمدىلىق اكتسيالارعا دا بەلسەنە قاتىستى. پاندەميا رەتتەلىپ، ەلدەگى جاعداي ءبىر قالىپقا كەلگەن سوڭ. وتكەن جىلى مەن باۋىرىممەن بىرگە «ابايعا اپارار جول» (پۋت ك ابايۋ) اتتى جوبانى قولعا الدىق. ماقسات - ۇلى اقىننىڭ 175 جىلدىق مەرەيتويىنا وراي باۋىرىم ەكەۋمىز الماتىدان سەمەيگە جاياۋ بارۋعا بەل بۋدىق. سولايشا 46 كۇننىڭ ىشىندە 1200 شاقىرىمدى باعىندىرىپ ابايدىڭ تۋعان مەكەنىنە جاياۋلاتىپ جەتتىك. كەيىن ماعان تانىستارىم نەگە ۆەلوسيپەد نەمەسە كولىكپەن جۇرمەيسىڭ دەگەن وي سالدى. سودان كەيىن كەلەسى ساپارىم ۆەلوسيپەدپەن باستالدى»، - دەدى دامير كۋشەيەۆ.
ياعني ساياحاتشى ۆيلوسيپەدپەن الماتىدان 5 وبلىستىڭ اۋماعى ارقىلى 2200 شاقىرىمدى ءجۇرىپ ءوتىپ اقتوبەگە جەتەدى. جانە ءبىر ايتا كەتەتىن جايت ۆەلوساياحاتشى ساپاردا جالعىز جۇرەدى. «ساياحات بيىلدا ءوز جالعاسىن تاپتى. جانە ول تۇركيادان باستالدى. مەن جازدا تۇركىستاننان ىستانبۇلعا ۇشىپ بارىپ، ودان ءارى تۇركيانىڭ بىرنەشە قالاسىن ۆەلوسيپەدپەن ارالاپ شىقتىم. الدىمەن ىستانبۇلدان انتالياعا باردىم، كەيىن يزميرگە، ودان سوڭ انكاراعا جەتتىم. انكارادا ءبىزدىڭ ەلشىلىكتىڭ ۇيىمداستىرۋىمەن تاۋەلسىزدىكتىڭ 30 جىلدىعىنا وراي ۆەلوجارىس ۇيىمداستىردىق. وتە جوعارى دەڭگەيدە ءوتتى»، - دەيدى ول.
وسىلايشا جەرلەسىمىز تۇركيانىڭ بىرنەشە قالاسىندا بولىپ، ۆەلوسيپەدپەن 36 كۇننىڭ ىشىندە 2700 شاقىرىمدى باعىندىرىپتى.
«ودان بولەك، وسى كۇزدە تاعى ءوز ەلىمىزدە ساپارلاتتىم. 12 -قازاندا الماتىدان ۆەلوسيپەدپەن شىعىپ سەمەي، وسكەمەن، پاۆلودار، نۇر- سۇلتان جانە قوستاناي اۋماعىن ءجۇرىپ ءوتتىم. بۇگىن تاعى جولعا دايىندالىپ جاتىرمىن. بۇيىرسا وڭتۇستىك كورەيا استاناسى سەۋلگە ۇشامىن. كەزەكتى ۆەلوشەرۋىم سەۋلدەن باستالادى. نەگە كورەيا دەگەن سۇراققا كەلسەك. كەلەسى جىلى 28 -قاڭتاردا قازاقستان مەن وڭتۇستىك كورەيا اراسىندا ەكىجاقتى ديپلوماتيالىق قارىم- قاتىناستىڭ ورناعانىنا 30 جىل تولادى. وسىعان وراي ۆەلوسيپەدپەن سەۋلدەن پۋسان قالاسىنا دەيىن ءجۇرىپ وتپەكپىن. اتالعان 2 قالانى الەمدەگى ەڭ ۇزىن ۆەلوجول بايلانىستىرىپ جاتىر. ءوزىڭىز بىلەتىندەي مەملەكەت باسشىسى بيىل تامىزدا جۇمىس ساپارىمەن وڭتۇستىك كورەياعا باردى. ساپار بارىسىندا قاسىم- جومارت توقايەۆ سەۋلدە اباي ەسكەرتكىشىنىڭ اشىلۋىنا قاتىستى»، - دەدى ۆەلوساياحاتشى. سونداي-اق، ول سەۋلدەگى ابايدىڭ ەسكەرتكىشىنە بارىپ، تاعزىم بىلدىرەتىنىن ايتا كەلە، قازاقستاندىقتاردى اتالعان ەلدىڭ تاريحى، مادەنيەتى جانە تىرشىلىگىمەن تانىستىرعىسى كەلەتىنىن جەتكىزدى.
«قازىر وڭتۇستىك كورەياعا اتتانۋعا ساقاداي ساي وتىرمىن. ەل تەڭىزگە جاقىن ورنالاسقاندىقتان اۋا رايى ىلعالدى، جاڭبىرلى جانە جەلدى بولىپ كەلەدى. وعان دا دايىندالدىم. ءبىراق ۆيزا جاعىنان كىشكەنە كەدەرگىلەر بولدى. پاندەمياعا بايلانىستى كوپتەگەن ەلدەر تۋريستەردىڭ كەلۋىنە تىيىم سالىپ جاتىر. ونىڭ ىشىندە كورەيا دا بار. مەن باقىتىما وراي، 24 -جەلتوقسان كۇنى ۆيزاعا قول جەتكىزدىم. ءبارى جوسپارداعىداي بولىپ جاتسا، كورەياعا ساپارىم كەلەسى جىلى 20 -قاڭتارعا دەيىن جالعاسادى جانە 700 شاقىرىمدى ۆەلوسيپەدپەن ءجۇرىپ وتپەكپىن. جانە ساپار بارىسىندا Instagram، Tik-Tok جەلىسىنە ۆيدەو، فوتو جۇكتەپ وتىرامىن»، - دەدى.
اۆتور: ءالي يبرايەۆ