قازاقستاندا «وميكرون» شتامى تىركەلگەن جوق - مينيسترلىك ب ق و- دان تاراعان اقپاراتتى جوققا شىعاردى

نۇر- سۇلتان. قازاقپارات - باتىس قازاقستان وبلىسىندا «وميكرون» شتامى انىقتالعانى تۋرالى اقپارات جالعان. بۇل تۋرالى دەنساۋلىق ساقتاۋ مينيسترلىگىنىڭ باسپا ءسوز قىزمەتى قازاقپارات تىلشىسىنە ايتتى.

«مەسسەندجەرلەردە تاراپ كەتكەن ول اقپارات - فەيك. باتىس قازاقستان وبلىستىق سانيتارلىق- ەپيدەميولوگيالىق دەپارتامەنتى باسشىسىنىڭ ورىنباسارى گۇلدانا كەرەيەۆا بۇل مالىمەتتىڭ جالعانىن ەكەنىن، باتىس قازاقستاندا ءبىر دە ءبىر جاعداي تىركەلمەگەنىن رەسمي ءمالىم ەتتى»، - دەدى باسپا ءسوز قىزمەتىنىڭ وكىلدەرى.

ۆەدومستۆو ماماندارىنىڭ ايتۋىنشا، اتالمىش اقپاراتتى جاريالاعان اقپارات قۇرالىنىڭ باسشىسى وقىرمانداردان كەشىرىم سۇراپ، مالىمەتتى رەسۋرستاردان الىپ تاستاعان.

ايتا كەتەيىك، ب ق و سانيتارلىق- ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى گۇلدانا كەرەيەۆا وڭىرلىك كوممۋنيكاتسيالار قىزمەتىندە وتكەن بريفينگىدە ب ق و- دا 100-دەن استام شەتەلدەن كەلگەن قازاقستاندىق باقىلاۋعا الىنعانىن عانا ايتقان ەدى. ونىڭ ىشىندە مىسىردان 69 ادام، ۇلى بريتانيادان 19، يتاليادان 13، گەرمانيادان 11 ادام كەلگەن.

«وبلىس اۋماعىندا «وميكرون» شتامى تابىلعان جوق. دەگەنمەن COVID-19 ەپيدەميولوگيالىق قاداعالاۋ جۇيەسىندە SARS- COV-2 جاڭا نۇسقالارىن ۋاقتىلى انىقتاۋدىڭ ماڭىزدىلىعىن ەسكەرە وتىرىپ، كوۆيد تابىلعان ناۋقاستاردىڭ وڭ ناتيجە قورىتىندىلارى نۇر- سۇلتان قالاسىنداعى ۇلتتىق ساراپتاما ورتالىعىنا جىبەرىلدى. ول سىنامالار زەرتتەلىپ جاتىر»، - دەگەن بولاتىن.

اۆتور: ەسىمجان ناقتىباي