ولار وليمپيادا ايماقتارى اراسىندا جول ءجۇرۋ ۋاقىتىن ءۇش ەسە قىسقارتادى. كەلە جاتقان قىسقى ويىندار بەيجىڭ وليمپياداسى دەپ اتالسا دا، تاعى دا قىتاي استاناسىنىڭ يانتسين اتتى قالا ماڭى اۋدانىندا جانە كورشى ايماقتىڭ چجانتسزياكوۋ شاھارىندا وتەدى. بەيجىڭنەن چجانتسزياكوۋعا اۆتوكولىكپەن جەتۋ ءۇشىن شامامەن ءۇش ساعات كەتەدى. كوروناۆيرۋسقا قاتىستى تەكسەرۋلەردى ەسكەرسەك، ودان دا كوپ ۋاقىت كەرەك. ال پويىزبەن بۇل اراعا ءبىر ساعاتتا جەتۋگە بولادى. سوندىقتان وليمپياداعا بارار باعىتتارعا اسىقپاي جۇرەتىن جانە جۇردەك پويىزدار قاتىنايدى.
بوتاگوز سىرعابايەۆا، ءتىلشى:
- بۇل پويىز جىلدامدىعىن ساعاتىنا 350 شاقىرىمعا دەيىن ارتتىرا الادى. ءتۇرلى ءوزىن- ءوزى تەكسەرۋ جۇيەلەرىمەن جابدىقتالعاندىقتان، ول «اقىلدى» قوزعالىس قۇرالى سانالادى. پويىزدى ادام باقىلاعانمەن ءوزى جۇرەدى. بۇل كوز ىلەسپەس شاپشاڭدىقپەن جۇرەتىن قىتايداعى العاشقى «اقىلدى پويىز».
ونى ماماندار بىلتىر عانا ارنايى قىسقى وليمپيادا ءۇشىن جاساپ شىعاردى. ال تەمىرجول كولىگىنىڭ ەكيپاجى «قارلى ارمان» دەپ اتالادى.
ۋ يفان، جۇيرىك پويىز ەكيپاجىنىڭ مۇشەسى:
- ەكيپاج قىسقى وليمپيادا تۋرالى تەرەڭ ءبىلىم الدى. سونىمەن قاتار ءبىز شەت تىلدەرى مەن ىم- يشارات ءتىلىن قارقىندى مەڭگەردىك. ال ەگەر ءسىز دەمالىس كۇندەرى بۇل پويىزعا وتىرساڭىز، سپورت كيىمىن كيگەن ءبىزدى كورە الاسىز. سوڭعى ون بەس جىل ىشىندە قىتايدا جوعارى جىلدامدىقتى پويىز جاساۋ قارقىندى دامىپ كەلەدى.
وسىدان ونشاقتى جىل بۇرىن ەلدەگى پويىزداردىڭ 5 پروتسەنتى عانا جۇردەك بولاتىن. ال قازىر ءار ءۇش جولاۋشىنىڭ ەكەۋى جىلدام جۇرەتىن باعىتتى تاڭداي الادى.
چجاو چانتسزيان، قىتاي تەمىرجولى دامۋ جانە رەفورمالاۋ دەپارتامەنتىنىڭ ديرەكتورى:
- جىل سوڭىنا دەيىن بىرنەشە جۇردەك پويىزى پايدالانۋعا بەرىلەدى. ءسويتىپ قىتايداعى جۇردەك پويىزعا ارنالعان تەمىرجول ۇزىندىعى 40 مىڭ شاقىرىمعا جەتەدى. بۇل بولاشاق ءۇشىن وتە ماڭىزدى قادام. بۇرناعى جىلدارى جۇردەك پويىز جۇرەتىن جولداردا اپات ءجيى بولاتىن. سودان كەيىن قاۋىپسىزدىك تالاپتارىنا ءجىتى ءمان بەرىلدى.
قازىر ءدال وسى قاتىناس قۇرالىمەن اۋە كەمەسىمەن ۇشقانداي قورىقپاي جۇرۋگە بولادى. قىتاي بيلىگى اق وليمپياداعا قاتىساتىندار مەن ونى تاماشالايتىن جانكۇيەرگە جۇردەك پويىزبەن قاتار اۆتوبۋس جانە تاكسي ۇسىنباقشى. ول ءۇشىن تاس جولداردا بۇل كولىكتەرگە ارنايى جولاق ءبولىندى.
اۆتورلارى: بوتاگوز سىرعابايەۆا
www.24.kz