كوكتايعاق، جەل، بوران - بەيسەنبىگە ارنالعان اۋا رايى بولجامى

نۇر-سۇلتان. قازاقپارات - قازگيدرومەت 23- جەلتوقسانعا ارنالعان اۋا رايى بولجامىن جاريالادى، دەپ حابارلايدى قازاقپارات.

ق ر باسىم بولىگىندە بۇرىنعىسىنشا سولتۇستىك-باتىس تسيكلونى جانە ونىمەن بايلانىسقان اتموسفەرالىق فرونتتار اسەرىن تيگىزەتىن بولادى. رەسپۋبليكا بويىنشا تۇمان، كوكتايعاق بولىپ، جەل كۇشەيەدى، سولتۇستىك-باتىستا، سولتۇستىكتە، ورتالىقتا جاياۋ بۇرقاسىن سوعادى.

سولتۇستىك قازاقستان وبلىسىنىڭ سولتۇستىگىندە، باتىسىندا بۇرقاسىن، كوكتايعاق، جەلدىڭ كۇشى تۇندە 15-20، ەكپىنى 23 م/س جەتەدى.

قاراعاندى، شىعىس قازاقستان وبلىستارىندا كوكتايعاق، جاياۋ بۇرقاسىن، تۇمان كۇتىلەدى.

قىزىلوردا وبلىسىنىڭ سولتۇستىگى جانە ورتالىعىندا، جامبىل وبلىسىنىڭ تاۋلى اۋداندارىندا كوكتايعاق، تۇمان تۇسەدى.

جامبىل وبلىسىنىڭ وڭتۇستىك-باتىسىندا، سولتۇستىك-شىعىسىندا جانە تاۋلى اۋداندارىندا، كۇندىز قىزىلوردا وبلىسىنىڭ ورتالىعىندا جەل 15-23 م/س جىلدامدىقپەن سوعادى.

اقمولا وبلىسىنىڭ باتىسىندا جانە وڭتۇستىگىندە جاياۋ بۇرقاسىن، كوكتايعاق، تۇمان كۇتىلىپ، تۇندە شىعىسىندا، كۇندىز وڭتۇستىگىندە جەل 15-20 م/س كۇشەيەدى.

اتىراۋ، ماڭعىستاۋ، اقتوبە، قوستاناي وبلىستارىنىڭ سولتۇستىگىندە تۇمان، كوكتايعاق كۇتىلەدى، جەل 15-20 م/س كۇشەيەدى.

تۇندە جانە تاڭەرتەڭ الماتى وبلىسىنىڭ شىعىسىندا جانە وڭتۇستىگىندە تۇمان كۇتىلەدى، الاكول اۋدانىندا جەل 17-22 م/س جىلدامدىقپەن سوعادى.

تۇركىستان وبلىسىنىڭ سولتۇستىگىندە، باتىسىندا جانە تاۋلى اۋداندارىندا جەلدىڭ 15-20 م/س كۇشەيۋى كۇتىلەدى.