بۇل تۋرالى «وتباسى بانك» ا ق باسقارما ءتوراعاسى ءلاززات يبراگيموۆا ايتىپ بەردى، دەپ حابارلايدى قازاقپارات.
«ءوز اقشاسىن زەينەتاقى قورىندا قالدىرعاندار دا دۇرىس شەشىم قابىلدادى دەپ سانايمىن. ءار ادامنىڭ جاعدايىنا جەكە-دارا قاراۋ كەرەك. ەگەر بۇل ءسىزدىڭ العاشقى باسپاناڭىز بولسا، ارينە، ونى ساتىپ الۋ قاجەت بولدى. ءبىراق سالىمشىلارىمىزدىڭ جاس ەرەكشەلىكتەرىنە قاراپ، باسىم بولىگى ەكىنشى نەمەسە ءۇشىنشى پاتەر العانىن كوردىك. تولىق تولەم جاساعان سالىمشىلاردىڭ كوپشىلىگى 45 جاستان اسقان. دەگەنمەن، ولاردىڭ كوبىنە ينۆەستيتسيالىق باسقارۋعا بەرۋ، زەينەتاقى اننۋيتەتىن ساتىپ الۋ وپتسياسىن پايدالانۋ كەرەك ەدى دەپ ەسەپتەيمىن»، - دەدى ءلاززات يبراگيموۆا ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
سونىمەن بىرگە، سپيكەردىڭ ايتۋىنشا، بۇل باعدارلاما قازاقستاندىقتاردىڭ ب ج ز ق- داعى اقشاسى تولىق ساقتالعانىن كورسەتتى.
«وتە كوپ سىن ايتىلىپ جاتىر. كەيبىرى اقشا جوق، بارلىعى باعالى قاعازداردا دەپ جازدى. شىن مانىندە بارلىق قاراجات ساقتاۋلى تۇر. قازىرگى ۋاقىتتا ءبىرىڭعاي جيناقتاۋشى زەينەتاقى قورى - زاڭ بويىنشا اقشانىڭ ساقتالۋىنا مەملەكەتتىك كەپىلدىگى بار جالعىز مەملەكەتتىك مەكەمە. سونداي-اق، بۇل رەسمي تۇردە جالاقى الۋدىڭ قانشالىقتى ماڭىزدى ەكەنىن كورسەتتى. 2000-جىلداردىڭ باسىندا ءتىپتى از جالاقى العان بارلىق ازاماتتار دا ايتارلىقتاي ۇلكەن ينۆەستيتسيالىق تابىس الدى»، - دەيدى ل. يبرايموۆا.
ل. يبراگيموۆا ءوزىنىڭ ەڭبەك جولىنان مىسال كەلتىرىپ، 1995-جىلعى 9- ساۋىردەن باستاپ جۇمىس ىستەيتىنىن جانە زەينەتاقى جيناقتارىن الۋ باعدارلاماسىن ءوزى دە پايدالانعانىن ايتتى.
«مەندە زەينەتاقى جيناقتارىنىڭ جەتكىلىكتى سوماسى بولدى، اسىرەسە 1998-2005-جىلدارى ءۇش-ءتورت جۇمىستا قىزمەت ەتتىم، بىرنەشە ۋنيۆەرسيتەتتە ساباق بەردىم جانە ينۆەستيتسيالىق تابىسىم بۇكىل زەينەتاقى جيناعىنىڭ 30 پايىزىنان استام جينالدى»، - دەدى ءلاززات يبراگيموۆا.