كۇنسۇلۋ زاكاريا ۆاكسينا جاساۋعا نەگە يناكتيۆتەندىرۋ تەحنولوگياسى قولدانىلعانىن ءتۇسىندىردى
بۇل تۋرالى QazVac ۆاكسيناسىن جاساۋشى عىلىمي توپتىڭ جەتەكشىسى، بيولوگيالىق قاۋىپسىزدىك پروبلەمالارى عىلىمي- زەرتتەۋ ينستيتۋتىنىڭ باس ديرەكتورى كۇنسۇلۋ زاكاريا «حابار 24» تەلەارناسىنان بەرىلەتىن «انىعىن ايتقاندا» باعدارلاماسىندا ايتتى، دەپ حابارلايدى قازاقپارات. «2020 -جىلدىڭ 9- مامىرىندا ءبىز وتاندىق ۆاكسينانى الىپ، دۇنيەجۇزىلىك دەنساۋلىق ۇيىمىنا دالەلدەپ، كورسەتتىك. وسىلايشا QazVac د د س ۇ- نىڭ تىركەۋىنە كانديدات ۆاكسينا بولىپ كىردى. سول كەزدە بىزگە ءبىلىم جانە عىلىم مينيسترلىگى ۇلكەن كومەك بەردى. اسحات قانات ۇلى (ايماعامبەتوۆ - رەد.) عىلىم كوميتەتىنە تاپسىرما بەرىپ، ارنايى عىلىمي تەحنيكالىق باعدارلاما ۇسىندى. ول نە دەگەن ءسوز؟ باعدارلاما ۇسىنىلعان كەزدە قارجى بەرىلەدى. جاڭاعى ۆاكسينانى جاساۋ ءۇشىن، ونى ءارى قاراي تەستىلەپ، ساراپتاۋ ءۇشىن قارجى كەرەك. ول ءۇشىن وتە كوپ رەاكتيۆ، ماتەريال، قۇرال- جابدىق قاجەت. قۇرال- جابدىققا بولەك اقشا بەرىلدى. سوندىقتان دا ءبىز جازدىڭ ورتاسىندا ۆاكسينا جاساۋعا تولىق دايىن تۇردىق. ءبىلىم جانە عىلىم ءمينيسترى بۇكىل مۇمكىندىكتى جاساعان بولاتىن»، - دەدى عالىم.
ول سونداي- اق، QazVac پلاتفورماسىنا نەگە يناكتيۆتەندىرۋ تەحنولوگياسىن پايدالانىلعانىن ءتۇسىندىردى.
«ءبىزدىڭ ينستيتۋت عالىمدارىنىڭ ەڭ نەگىزگى تاجىريبەسى - يناكتيۆتەلگەن ۆاكسينا شىعارۋ. نەگە دەسەڭىز، يناكتيۆتەلگەن ۆاكسينانى ادامزات 60 جىلدام استام ۋاقىت بويى پايدالانىپ كەلەدى. تەحنولوگياسى ابدەن زەرتتەلگەن جانە سوعان ۇقساس ۆاكسينالاردى بۇرىن دا شىعارعانبىز. تەحنولوگيانىڭ ءوزى 9 ساتىدان تۇرادى. ەڭ نەگىزگىسى - جاسۋشا ءوسىرۋ. جاسۋشا - ۆيرۋستىڭ قورەگى. ەڭ ءبىرىنشى جاسۋشا وسىرىلەدى. جاسۋشانىڭ ۇستىندە ۆيرۋس وسەدى. ۆيرۋس وسكەننەن كەيىن ونى 4 كەزەڭمەن تازارتادى. ءارى قاراي ۆيرۋستى ولتىرەدى. ويتكەنى بىزدە يناكتيۆتەلگەن ۆاكسيناعا ۆيرۋس ءولتىرىلىپ پايدالانىلادى. ودان كەيىن بالك- پرودۋكت جاسالادى. ول ءونىم كەلەسى ساتىعا تۇسەدى»، - دەدى مامان.
اۆتور: ەسىمجان ناقتىباي