بەلگيادا «توميريس» فيلمىنىڭ كورسەتىلىمى ءوتتى
قازاقستان رەسپۋبليكاسىنىڭ بەلگياداعى ەلشىلىگىنىڭ حابارلاۋىنشا، شارانى فرانسياداعى قازاقستان كينوسى قاۋىمداستىعىنىڭ قولداۋىمەن بەلگيا، ليۋكسەمبۋرگ جانە فرانسياداعى قازاقستان كينوسى اپتالىعى اياسىندا قازاقستاندىق ديپلوماتتار ۇيىمداستىرعان. سانيتارلىق شەكتەۋلەرگە قاراماستان، قازاقستاندىق كينەماتوگرافياعا دەگەن قىزىعۋشىلىق جوعارى بولدى. ەكى جىلدا ءبىرىنشى رەت كورسەتىلىم وفلاين-فورماتتا ءوتىپ وتىر.
شارا قوناقتارى اراسىندا ەۋروكوميسسيانىڭ ەۋروپالىق سىرتقى بايلانىستار قىزمەتى، ەۋروپالىق پارلامەنت، ناتو، بريۋسسەل قالاسىنداعى ديپلوماتيالىق كورپۋس قىزمەتكەرلەرى جانە وزگە دە رەسمي تۇلعالار بولدى.
الايدا كەلۋشىلەردىڭ باسىم بولىگى جەرگىلىكتى تۇرعىندار مەن قازاقستاندىق دياسپورا وكىلدەرى بولدى. ولار ەلىمىزدىڭ تاۋەلسىزدىك جىلدارى جەتكەن ەكونوميكالىق جانە مادەني-گۋمانيتارلىق دامۋ سالاسىنداعى جەتىستىكتەرىنە ارنالعان سۋرەتتەر كورمەسىن تانىستى.
شارا قوناقتارىن قارسى الۋ كەزىندە قازاقستاننىڭ بەلگياداعى ۋاقىتشا سەنىمدى وكىلى جاندوس بۇحبانتايەۆ 30 -جىلدا قازاقستاننىڭ ەكونوميكا، مادەنيەت جانە سىرتقى ساياساتتا ايتارلىقتاي جەتىستىكتەرگە جەتكەنىن اتاپ ءوتتى.
قازاقستان ەۋروپالىق وداق جانە ەۋروپانىڭ وزگە دە ەلدەرىمەن سەنىمدى جانە ءوزارا ءتيىمدى قارىم-قاتىناستار قۇردى.
ج. بۇحبانتايەۆتىڭ ايتۋىنشا، «توميريس» كارتيناسى ارنايى تاڭدالدى - سەبەبى فيلم قازاق جەرىندە تىرشىلىك ەتكەن ەجەلگى تايپالاردىڭ باي تاريحىن كورسەتىپ قانا قويماي، سونىمەن قاتار كارتينا اۆتورلارىنىڭ باستى يدەياسى - بىرلىك پەن پاتريوتيزمدى ساقتاۋ مەن قازاق مەملەكەتتىلىگىن نىعايتۋدىڭ ماڭىزىن باياندايدى.
قازاقستان كينوسى قاۋىمداستىعىنىڭ جەتەكشىسى اندرەي يۆانوۆ، سونىمەن قاتار توميريستىڭ اپكەسىنىڭ ءرولىن سومداعان ايجان يرگاليەۆا كورەرمەندەرگە زاماناۋي قازاقستاندىق كينو ونەرىنە قىزىعۋشىلىق تانىتقانى ءۇشىن العىسىن ءبىلدىردى.
قازاق كينوسى ەۋروپالىق كينوماندار اراسىندا تانىمال بولىپ كەلەدى. CINEMATEK - بەلگيا استاناسىنداعى كينوفەستيۆال وتكىزۋگە ارنالعان ءىرى ورتالىق. مۇندا 1938-جىلى انري شتورك، اندرە تيريفەيس جانە پيتوم ۆەرمەيلەن نەگىزىن قالاعان كورولدىك فيلمدەر بەينەقورى ورنالاسقان، ىشىندە 180000 كوشىرمە مەن 85000 نەگاتيۆ ساقتالعان. كينو اپتالىعى اياسىندا 2021-جىلدىڭ 15- جەلتوقسانى كۇنى ليۋكسەمبۋرگ كورەرمەندەرى «كينەپوليس» ءىرى كينوتەاترىندا كانن فەستيۆالىنىڭ لاۋرەاتى اكتريسا سامال ەسلياموۆا تۇسكەن «ۋاقىت جولدارى» فيلمىن تاماشالاي الادى.