اقمولا وبلىسىندا كوروناۆيرۋسقا شالدىعۋ كورسەتكىشى قانداي
بۇل تۋرالى اقمولا وبلىسىنىڭ باس مەملەكەتتىك سانيتارلىق دارىگەرى ايناگۇل مۋسينا ءمالىم ەتتى، دەپ حابارلايدى قازاقپارات ءتىلشىسى.
اقمولا وبلىسىندا COVID-19-عا قارسى ۆاكسيناتسيالاۋعا 133 ەگۋ پۋنكتى جۇمىلدىرىلدى. ەگۋ ناۋقانى باستالعاننان بەرى بەس ۆاكسينانىڭ ءبىرىنشى كومپونەنتىمەن 319321 ادام ەگىلدى، بۇل تيىسىنشە حالىقتىڭ 66,6 پايىزىن، ال حالىقتىڭ جالپى سانىنىڭ 43,4 پايىزىن قۇرايدى. ۆاكسينانىڭ ەكىنشى كومپونەنتىن 290232 ادام الدى، بۇل تيىسىنشە حالىقتىڭ جالپى سانىنىڭ 60,5 پايىزىن، حالىقتىڭ جالپى سانىنىڭ 39,5 پايىزىن قۇرادى.
«ۆاكسيناتسيالاۋ ارقىلى يممۋنيتەت العان ادامدار سانىنىڭ ارتۋىنان كوروناۆيرۋس ينفەكسياسىن جۇقتىرعاندار ەڭ كوپ تىركەلگەن تامىز ايىمەن سالىستىرعاندا، اۋرۋشاڭدىق ءۇش ەسە تومەندەدى. تامىزدا ول 8334 قۇرادى، قاراشادا 2458 گە دەيىن جانە جەلتوقساندا 793-كە دەيىن تومەندەدى»، - دەپ اتاپ ءوتتى ا. مۋسينا.
ءوڭىردىڭ باس سانيتارلىق دارىگەرىنىڭ ايتۋىنشا، كوروناۆيرۋسقا شالدىققاندار سانىنىڭ تومەندەۋىنە ۆاكسيناتسيانىڭ كۇندەلىكتى قارقىنىنىڭ ارتۋى ىقپال ەتتى. ماسەلەن، ەگەر قاراشادا تاۋلىگىنە 400 گە جۋىق ادام ۆاكسيناتسيادان وتسە، جەلتوقساندا 1000 جەتتى. بۇگىنگى تاڭدا وبلىس Pfizer/BioNTech شىعارعان «كوميرناتي» ۆاكسيناسىنىڭ ءبىرىنشى كومپونەنتىنىڭ 35100 دوزاسىن الدى، 2417 (3,5 پايىز) ەگىلدى، ونىڭ ىشىندە 50 جۇكتى ايەل، لاكتاتسيا كەزىندە 550 ايەل جانە 1817 جاس ءوسپىرىم. ۆاكسيناعا جاعىمسىز رەاكسيالار تىركەلمەگەن.