جەلتوقسان وقيعاسىنىڭ رەسمي قۇجاتتارى كىتاپ بولىپ شىقتى
جەلتوقسان وقيعاسىنا بيىل 35 جىل تولىپ وتىر. وسىعان وراي، تاۋەلسىزدىكتىڭ 30 جىلدىعى اياسىندا ق ر پارلامەنتى ءماجىلىسىنىڭ دەپۋتاتى، «قازاق ءتىلى» قوعامىنىڭ پرەزيدەنتى بەرىك ءابدىعالي ۇلىنىڭ باستاماسىمەن ارحيۆ قۇجاتتارىنا نەگىزدەلگەن دەرەكتى جىلناما جارىق كوردى.
كىتاپتىڭ تۇساۋكەسەرىنە ءماجىلىس دەپۋتاتتارى، تاريحشىلار مەن قوعام قايرەتكەرلەرى قاتىستى.
«ءبىزدىڭ بۋىن تاۋەلسىزدىك العان كەزدە 20 جاستا ەدىك. ياعني 1986-جىلى جەلتوقسان بولىپ جاتقاندا ءبىز 15 تەگى بالا بولدىق. سولاردىڭ ارقاسىندا جىگەرلەنىپ، رۋحتانىپ وستىك. سوندىقتان جەلتوقسان قاھارماندارى ءبىز ءۇشىن ءاردايىم باتىر. ارينە، تاعدىرى ءار ءتۇرلى بولدى. وزدەرى دە سەزەدى قۇربان بولعانىن. قازىر ماقتان تۇتىپ جۇرگەن ازاتتىعىمىز دا، سول ازاتتىقپەن بىرگە كەلگەن جەتىستىكتەرىمىز دە سولاردىڭ ارقاسىندا ورنادى. ءبىز ولارعا جالپىۇلتتىق لايىقتى ساياسي باعاسىن بەرە الماي جاتىرمىز. ارامىزدا جۇرگەن ءتىرى باتىرلار عوي بۇلار. قاراپايىم ستۋدەنت قىز-جىگىتتەر جاستىق جىگەردىڭ، ۇلتتىق نامىستىڭ قانداي بولۋ كەرەكتىگىن بارىمىزگە كورسەتىپ كەتتى. سوندىقتان تاۋەلسىزدىك تويلارىندا ەڭ ءبىرىنشى قۇرمەت سولارعا كورسەتىلۋى كەرەك. ەكىنشىدەن، بۇل تاقىرىپتىڭ ءوزى ءالى زەرتتەلگەن جوق. كىتاپ شىعارعانداعى ماقساتىمىز وسىنى عالىمدار زەرتتەسە ەكەن دەگەن نيەت ەدى. كىتاپتىڭ ىشىندە قانشاما ءتىزىم بار. سولاردىڭ ءبارىنىڭ تاعدىرىن انىقتاسا تاريح دەگەنىڭىز سول»، - دەدى باستاما اۆتورى بەرىك ءابدىعالي ۇلى.
قۇندى جيناقتىڭ باسپا شىعىندارىنا «التىن قىران» قوعامدىق قورى دەمەۋشىلىك ەتكەن. 1000 دانامەن شىققان جيناق جەلتوقسان تاقىرىبىن زەرتتەپ جۇرگەن عالىمدار مەن كىتاپحانالارعا تاراتىلماق. قوردىڭ اتقارۋشى ديرەكتورى ماقسۇتبەك ايتماعانبەت قاجەتتىلىك تۋىنداپ جاتسا، جيناقتى قايتا باسىپ شىعارۋعا دايىن ەكەندەرىن ايتادى.
«التىن قىران» قوعامدىق قورى 15 جىلدام استام ۋاقىت بويى قازاق قوعامىنا كەرەك دەگەن سالالاردا جۇمىس ىستەپ كەلە جاتقانىن بىلەسىزدەر. ونىڭ ىشىندە قازاق ءتىلى، قازاق ادەبيەتى، قازاقستان تاريحى باعىتىندا عالىمداردى قولداپ، باستامالارىنا دەمەۋشىلىك جاساپ جۇرەمىز. سونى ەسكەرسە كەرەك، بەرىك ءابىدعالي ۇلى بىزگە شىعىپ ۇسىنىس جاسادى. قوردىڭ قامقورلىق كەڭەسىنىڭ ءتوراعاسى يسلامبەك سالجانوۆ بىردەپ قۇپ كورىپ، كىتاپتىڭ شىعۋىنا اتسالىستىق. ازىرگە 1000 دانا بولىپ شىعىپ جاتىر. ەل تالاپ اكەتىپ، جەتپەي جاتسا، تاعى دا كومەكتەسۋگە دايىنبىز»، - دەدى قوردىڭ وكىلى.
جەلتوقسان بوزداقتارىنا قاتىستى دەرەكتىڭ ءبارى سول كەزدە ورىس تىلىندە جۇرگىزىلگەندىكتەن، كىتاپ تا ورىس تىلىندە جازىلعان. جيىنعا قاتىسۋشىلار بۇل ەڭبەكتىڭ جەلتوقسان تاقىرىبىن زەرتتەۋگە بەت بۇرعان ماماندارعا تاپتىرماس دەرەككوز بولاتىنىن ايتتى.
كىتاپتىڭ ىشىندەگى QR- كود ارقىلى وسى تاقىرىپتاعى «اللاجار» فيلمىن دە كورۋگە بولادى.