سىرتقى جارنامالاردىڭ قازاق تىلىندە دۇرىس جازىلۋىن تالاپ ەتەتىن قۇجات پارلامەنتتە قابىلداندى

نۇر-سۇلتان. قازاقپارات - بۇگىن ءماجىلىستىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كورنەكى اقپارات جانە ءدىني قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا سەنات ەنگىزگەن وزگەرىستەرمەن كەلىستى، دەپ حابارلايدى قازاقپارات ءتىلشىسى.

زاڭ جوباسىنىڭ ماقساتى - سىرتقى جارنامالار مەن ءارتۇرلى ماڭدايشالارداعى، باسقا دا رەكۆيزيستتەر مەن كورنەكى اقپاراتتاردىڭ مەملەكەتتىك تىلدە دۇرىس جازىلۋى جانە ماتىندەردىڭ ءتۇپنۇسقالى اۋدارماسى بويىنشا قوسىمشا تالاپتاردى بەلگىلەۋ. بۇدان باسقا، ءدىن سالاسىنداعى زاڭنامانى جەتىلدىرۋدى كوزدەيتىن نورمالار ەنگىزىلدى.

«اتالعان زاڭ جوباسىن پارلامەنت ءماجىلىسى 2021 -جىلعى 6-قازاندا ماقۇلدادى جانە ول پارلامەنت سەناتىنا قابىلدانعان 54 پوزيتسيامەن جىبەرىلدى. سەنات «ءدىني قىزمەت جانە ءدىني بىرلەستىكتەر تۋرالى» زاڭىنا ار- وجدان بوستاندىعى قۇقىعىن جۇزەگە اسىرۋ، ءدىني ءىس- شارالاردى عيبادات ۇيلەرىنەن (عيماراتتاردان) تىس جەرلەردە وتكىزۋ ءۇشىن ەنگىزىلەتىن حابارلاما ءتارتىبىن راسىمدەۋ ءارى ناقتىلاۋ بولىگىندە تۇزەتۋلەر ەنگىزدى. ءماجىلىستىڭ الەۋمەتتىك- مادەني دامۋ كوميتەتى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كورنەكى اقپارات جانە ءدىني قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا سەنات ەنگىزگەن وزگەرىستەرمەن كەلىسۋدى ۇسىنادى»، - دەدى ءماجىلىس دەپۋتات ءجاميلا نۇرمانبەتوۆا.

قۇجاتتى قاراۋ كەزىندە پالاتا دەپۋتاتتارى بۇل ۇسىنىسقا قولداۋ ءبىلدىردى. ايتا كەتەيىك، جاقىندا سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كورنەكى اقپارات جانە ءدىني قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكى وقىلىمدا قارالدى. قۇجاتقا تۇزەتۋلەر ەنگىزىلگەندىكتەن، زاڭ جوباسى ماجىلىسكە قايتارىلدى.

اۆتور: رۋسلان عابباسوۆ