مەكتەپتەردە جاڭاجىلدىق ءىس-شارالار وتكىزىلمەيدى - ءبىلىم مينيسترلىگى
ايتا كەتەيىك، جاقىندا ق ر باس سانيتار دارىگەرى ەرلان قياسوۆ كوروناۆيرۋس ينفەكسياسىنىڭ «وميكرون» شتامى قازاقستان اۋماعىندا تارالماۋىنا ارنالعان جاڭا قاۋلى جاريالادى.
«ەرتەڭگىلىكتەر مەن وزگە دە بۇقارالىق ءىس- شارالار مەكتەپتەردە وتكىزىلمەيدى. وسى ورايدا باس سانيتار دارىگەرىنىڭ شەشىمى بولعاندىقتان، ءبىز ونى ورىنداۋعا مىندەتتىمىز. سوندىقتان ەرتەڭگىلىكتەر مەن باسقا دا مەرەكەلىك جيىندار مەكتەپتە ۇيىمداستىرىلمايدى»، - دەدى ا. ايماعامبەتوۆ سەناتتىڭ جالپى وتىرىسىنان كەيىن تىلشىلەر ساۋالىنا جاۋاپ بەرە وتىرىپ.
ونىڭ ايتۋىنشا، ءبىر سىنىپتىڭ ىشىندە مەرەكەنى وتكىزۋ تۋرالى شەشىم مەكتەپ اكىمشىلىگى دەڭگەيىندە قابىلدانادى.
سونىمەن قاتار تىلشىلەر «وميكرون» شتامىنىڭ تارالۋىنا بايلانىستى وقۋشىلاردى قاشىقتان وقىتۋعا اۋىستىرۋ مۇمكىندىگى تۋرالى سۇرادى.
«قازىرگى كەزدە بۇل جايىندا ايتۋ ەرتەرەك. ءبىز ۆەدومستۆوارالىق كوميسسيانىڭ شەشىمى اياسىندا جۇمىس ىستەيمىز. قازىرگى ۋاقىتتا قورىتىندى شىعارۋ ءۇشىن مالىمەتتەر جەتكىلىكسىز بولىپ تۇر»، - دەدى مينيستر.
اۆتور: رۋسلان عابباسوۆ