امەريكالىق وتباسى اسىراپ العان قازاقستاندىق ءوز تۋىستارىن تاپتى

كوكشەتاۋ. قازاقپارات - امەريكالىق وتباسى اسىراپ العان قازاقستاندىق جىگىت ءوز تۋىستارىن تاپتى. بۇل تۋرالى قازاقپارات تىلشىسىنە ونىڭ اپكەسى ەليزابەت ازيز ايتىپ بەردى.

امەريكالىقتار اسىراپ العان قازاقستاندىق اندرەي شاتالين ءوزىنىڭ بيولوگيالىق اتا-اناسىن ىزدەپ جۇرگەنى تۋرالى العاشقى جاريالانىمىمىزدان كەيىن الەۋمەتتىك جەلى قولدانۋشىلارى اندرەي شاتاليننىڭ اناسىمەن جانە تۋىستارىمەن تانىس ەكەندىكتەرىن جازعان.

وسى رەتتە قازاقپارات ءتىلشىسى اقپاراتتى راستاعان ەليزابەت ازيز ەسىمدى اپكەسىمەن حابارلاستى. «ءبىز ونىڭ تۋعان وتباسىن تاپتىق، كومەكتەسكەندەرىڭىز ءۇشىن راحمەت»، - دەپ جاۋاپ بەردى ەليزابەت ازيز.

بۇرىن قىز ونىڭ بيولوگيالىق اناسى قايتىس بولۋى مۇمكىن دەپ ايتقان، ءبىراق ول ءوزىنىڭ اعاسى اندرەي شاتاليننىڭ وتباسىن نەمەسە باۋىرلارىن، اپكەلەرىن ىزدەگەن بولاتىن.

«مەنىڭ اعام دا، مەن سياقتى اسىراپ الىندى. ول 2005 -جىلى اسىراپ الىندى. ونىڭ تۋعان كەزدەگى ەسىمى - اندرەي شاتالين. ول شامامەن 13-19-قازاندا دۇنيەگە كەلگەن. ءار قۇجاتتاعى كۇن ءار ءتۇرلى. بىزدە ونىڭ بيولوگيالىق اناسى ناتاليا الەكسەيەۆنا شاتالينا تۋرالى اقپارات بار. ول شامامەن 1973 -جىلى دۇنيەگە كەلگەن جانە 2012 -جىلى قايتىس بولعان-مىس. قۇجاتتاردا ونىڭ اندرەيگە دەيىن تاعى ءبىر بالاسى بولعاندىعى ايتىلعان، سوندىقتان ءبىز ول تۋرالى جانە باسقا دا ىقتيمال اعالارى مەن اپكەلەرى تۋرالى بىلۋگە تىرىسامىز»، - دەدى ەليزابەت ازيز قازاقپارات تىلشىسىنە.

قىزدىڭ ايتۋىنشا، ونىڭ اعاسى استانا قالاسىندا (قازىرگى نۇر-سۇلتان - اۆت) دۇنيەگە كەلگەن، سودان كەيىن ونى ماناس كوشەسىندەگى اۋرۋحانادا قالدىرعان. كەيىن ونى ەلورداداعى مامانداندىرىلعان بالالار ۇيىنە تاپسىردى.

«ونىڭ اناسى اقمولا وبلىسىنىڭ ستەپنوگور قالاسىندا تۋعان. تۋۋ تۋرالى كۋالىكتە تۋعان اكەسىنىڭ اتى جوق. سونداي-اق، ءبىز اندرەيدىڭ بيولوگيالىق اناسىنىڭ وتباسى مۇشەلەرى تۋرالى اقپارات تابۋعا تىرىسامىز. كەيبىر مالىمەتتەر بويىنشا، اندرەي جارتىلاي ورىس، جارتىلاي قازاق»، - دەدى ەليزابەت ازيز.

ەسكە سالا كەتسەك، امەريكالىقتار اسىراپ العان قازاقستاندىق جىگىت ءوز تۋىستارىن ىزدەپ جاتقانى تۋرالى حابارلاعان بولاتىنبىز.

اۆتور: اسلان وسپانوۆ