اسكەري بورىشىن وتەپ جۇرگەن جاستار نارىقتا تاپشى ماماندىقتارعا وقىتىلادى - مينيسترلىك
«حالىق بىرلىگى جانە جۇيەلى رەفورمالار - ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىندا «تەگىن تەحنيكالىق جانە كاسىپتىك ءبىلىم بەرۋ» جوباسىن ىسكە اسىرۋدى جالعاستىرۋ قاجەتتىگىن اتاپ ءوتتى. پرەزيدەنت كاسىبي باعدار بەرۋ جانە جاستاردى وقىتۋ جۇيەسىندەگى قارۋلى كۇشتەردىڭ رولىنە جەكە توقتالدى: «ماماندىق الۋدىڭ تاعى ءبىر مۇمكىندىگى ارميادا بەرىلۋى ءتيىس. مەرزىمدى قىزمەتتەگى ساربازداردىڭ ەكونوميكاداعى ناقتى سەكتور ءۇشىن قاجەتتى جۇمىسشى ماماندىعىن يگەرۋ ماسەلەسىن پىسىقتاعان ءجون».
«قورعانىس مينيسترلىگى بۇگىندە ەڭبەك نارىعىندا سۇرانىسقا يە مەرزىمدى قىزمەتتەگى اسكەري قىزمەتشىلەردىڭ ماماندىقتارىنا مونيتورينگ جۇرگىزۋدە. ونىڭ ناتيجەلەرى بويىنشا جۇمىسشى ماماندىقتارى بويىنشا دايارلاۋ ۇيىمداستىرىلادى. جاستار اسكەردە بورىشىن وتەپ جۇرگەن كەزدە وتاندىق نارىقتا تاپشى قاجەتتى ءبىلىمدى، داعدىلار مەن ماماندىقتاردى تەگىن الادى. ساربازدارعا قۇرلىق اسكەرلەرىنىڭ، اۋە قورعانىسى كۇشتەرىنىڭ، بايلانىس دەپارتامەنتتەرىنىڭ، رادياتسيالىق، حيميالىق، بيولوگيالىق قورعاۋ جانە ەكولوگيالىق قاۋىپسىزدىك اسكەرلەرىنىڭ كىشى ماماندارىن دايىندايتىن وقۋ- جاتتىعۋ ورتالىقتارىندا كاسىبي ءبىلىم بەرىلەتىن بولادى»، - دەلىنگەن مينيسترلىك حابارلاماسىندا.
ءمالىم ەتىلگەندەي، مەرزىمدى اسكەري قىزمەتشىلەر قوس ماقساتتاعى اسكەري ماماندىقتاردى مەڭگەرەدى. ونىڭ ىشىندە اۋىر جۇك ماشينالارىنىڭ جۇرگىزۋشىلەرى، ەكسكاۆاتورشىلار، تراكتورشىلار، جول توسەگىشتەر، ديزەليستەر - ەلەكتريكتەر، بايلانىس ماماندارى جانە تاعى باسقالار بار.
«العان ماماندىعى جاستارعا اسكەردەن كەيىنگى ومىردە دە كادەگە جارارى انىق. قۇرلىق اسكەرلەرىنىڭ وقۋ- جاتتىعۋ ورتالىعىندا قازىردىڭ وزىندە جۇك كولىكتەرىنىڭ جۇرگىزۋشىلەرىن دايارلاۋعا ارنالعان وقۋ روتاسى قۇرىلدى. جىل سايىن مۇندا ەڭبەك نارىعىندا سۇرانىسقا يە ماماندىقتار بويىنشا 160 قا جۋىق مامان دايارلاۋ جوسپارلانىپ وتىر. ساباقتار الداعى جىلى باستالادى»، - دەدى مينيسترلىكتەن.