ءۇشارال-دوستىق تاس جولى جابىلدى

تالدىقورعان. قازاقپارات - «ءۇشارال-دوستىق» تاس جولى بارلىق كولىك ءۇشىن جابىلدى.

اتالعان ايماقتا قاتتى بوران سوعىپ، جول كورىنبەيدى، دەپ حابارلايدى قازاقپارات ءتىلشىسى.

«20- قاراشا كۇنى ساعات 14.30 دان باستاپ اۋا رايىنىڭ قولايسىزدىعىنا بايلانىستى ءۇشارال - دوستىق» رەسپۋبليكالىق ماڭىزى بار اۆتوجولىنىڭ 84-184 شاقىرىمى ارالىعىندا بارلىق اۆتوكولىك قوزعالىسى جابىلدى. اتالعان ايماقتا قاتتى جەل، بوران سوعىپ تۇر»، دەلىنگەن الماتى وبلىسى توتەنشە جاعدايلار دەپارتامەنتىنىڭ باسپا ءسوز قىزمەتى تاراتقان حابارلامادا.

وسىعان بايلانىستى، وبلىستىق ت ج د ازاماتتاردان اتالعان باعىتتاعى ساپاردان باس تارتۋدى جانە 112 قىزمەتى بەرەتىن حابارلامانى نازاردان تىس قالدىرماۋدى سۇرايدى.

الىس جولعا شىققان كەزدە اۋا رايى بولجامىمەن تانىسىپ، توتەنشە جاعدايدا قاجەتتى بارلىق زاتتى وزىڭىزبەن بىرگە الىپ جۇرۋگە كەڭەس بەرەدى.