ايماعامبەتوۆ گرانت قاراجاتىن ستۋدەنتتىڭ بانكتىك شوتىنا اۋدارۋ تيىمدىلىگىن اتادى
«مەملەكەت باسشىسىنىڭ جوعارى ءبىلىم بەرۋدى قارجىلاندىرۋ جۇيەسىن وزگەرتۋ جونىندەگى باستاماسىنىڭ ماڭىزدىلىعى تۋرالى ەگجەي-تەگجەيلى ءتۇسىندىرىپ وتسەم. بۇگىنگى تاڭدا وتاندىق جوعارى وقۋ ورىندارى گرانت بەرۋ ارقىلى جان باسىنا قارجىلاندىرۋعا كوشتى. بۇل جۇيە قازىر قالاي جۇمىس ىستەيدى؟ گرانت الۋ ءۇشىن تالاپكەرلەر ۇلتتىق ءبىرىڭعاي تەستىلەۋگە قاتىسادى. ۇ ب ت تاپسىرعاننان كەيىن تالاپكەر ءوتىنىش بەرەدى، ناقتى ماماندىقتى تاڭداپ، گرانتتاردى تاعايىنداۋ كونكۋرسىنا قاتىسادى. ماسەلەن، ەگەر بەلگىلى ءبىر ماماندىققا بارلىعى 100 گرانت بولىنسە، كۆوتالاردى ەسەپكە الا وتىرىپ، ەڭ جوعارى بالل جيناعان 100 تالاپكەر سارالانعان ءتىزىم بويىنشا ج و و- دا وقۋ ءۇشىن گرانت الادى. ءبىلىم گرانتىن يەلەنگەن ستۋدەنت جوعارى وقۋ ورنىن تاڭدايدى جانە ج و و وسى ستۋدەنتتى وقىتۋ ءۇشىن بيۋجەتتەن قارجىلاندىرۋ الادى»، - دەپ جازدى مينيستر Facebook-پاراقشاسىندا.
الايدا، ونىڭ اتاپ وتۋىنشە، ستۋدەنت گرانتتى جەڭىپ العانىنا قاراماستان، مەملەكەت تاراپىنان تولەنەتىن وقۋ اقىسىنا قاتىستى راسىمگە قاتىسپايدى. شىن مانىندە، ستۋدەنت جوعارى وقۋ ورنىنداعى وقۋ اقىسىن مەملەكەت ونىڭ مەكتەپ كەزىندەگى جاقسى كورسەتكىشتەرى ءۇشىن تولەيتىنىنە ءمان بەرمەي، مۇنى كوبىنە كوپ تەگىن وقۋ دەپ قابىلدايدى. سايكەسىنشە، «تەگىن» وقۋ كەزىندە ۋنيۆەرسيتەتكە قانداي دا ءبىر تالاپ قويۋ قيىن. ءاربىر ستۋدەنتتىڭ وقۋى ءۇشىن مەملەكەت جوعارى وقۋ ورنىنا ورتا ەسەپپەن 3,5-4 ميلليون تەڭگە بولەدى.
«وقۋ اقىسىن تولەۋ الگوريتمى كەلەسىدەي: ۋنيۆەرسيتەتتەر ستۋدەنتتەردىڭ تىزىمدەرى مەن تولەۋ اكتىلەرىن بەلگىلى ءبىر مەرزىمدىلىكپەن مينيسترلىككە جىبەرەدى. مينيسترلىك ستۋدەنتتەردىڭ ءارقايسىسى ءۇشىن اقشانى ج و و- نىڭ شوتىنا تىكەلەي اۋدارادى. ياعني، ستۋدەنتتىڭ ءوزى بۇل ۇردىسكە قاتىسپايدى. ەندى مەملەكەت باسشىسى قارجىلاندىرۋدىڭ وسى جۇيەسىن وزگەرتۋدى تاپسىردى. بۇدان بىلاي قاراجات گرانتتى جەڭىپ العان ستۋدەنتتىڭ وقۋ اقىسىن ءوز بەتىنشە تولەۋى ءۇشىن ارنايى بانكتىك شوتىنا (ەسكروۋ-شوت) تىكەلەي جىبەرىلەدى دەپ جوسپارلانۋدا.
وسىلايشا، ستۋدەنت ونىڭ وقۋى ءۇشىن مەملەكەت بولگەن اقشانى كورىپ، قولداۋدى سەزىنەدى. سونىمەن بىرگە وقۋ اقىسىن تولەۋ ۇردىسىنە قاتىسادى»، - دەدى اسحات ايماعامبەتوۆ.
مينيستر قازىرگى تاڭدا ستۋدەنت بۇرىنعىداي تەگىن قىزمەتتەردى الۋشى ەمەس، قىزمەتتەرگە تاپسىرىس بەرۋشى بولىپ سانالاتىندىعىن باسا ايتادى. سوعان وراي ول تاپسىرىس بەرۋشى رەتىندە ساپالى ءبىلىم بەرۋدى تالاپ ەتۋگە قۇقىلى.
«ارينە، بۇل ستۋدەنتتىڭ مەملەكەتتىك قولداۋ ءىس-شارالارىن قابىلداۋىنا وڭ اسەر ەتەدى جانە ونىڭ بويىنداعى جاۋاپكەرشىلىكتى ارتتىرادى. ميلليونداعان قاراجاتتىڭ وقۋعا جۇمسالعانىن كورىپ، ستۋدەنت ءبىلىم الۋعا دا، كورسەتىلەتىن قىزمەت ساپاسىنا دا جاۋاپكەرشىلىكپەن قارايدى. بۇل رەتتە ستۋدەنت بيۋجەت قاراجاتىن ءبىلىم الىپ جاتقان ج و و- عا وقۋ اقىسىن تولەۋدەن باسقا، وزگە ماقساتتارعا جۇمساي المايدى. بۇدان باسقا، بۇل تەتىك سىبايلاس جەمقورلىق تاۋەكەلدەرىن دە جويىپ، بيۋجەت قاراجاتىنىڭ بارىنشا اشىق جۇمسالۋىن قامتاماسىز ەتەدى. اتالعان ءىس-شارا جوعارى ءبىلىم بەرۋ سالاسىنداعى باسەكەلەستىكتى كۇشەيتەدى دەپ كۇتىلۋدە. مەملەكەت باسشىسىنىڭ وسىنداي ماڭىزدى تاپسىرمالارى بۇكىل ءبىلىم بەرۋ جۇيەسىن كەشەندى جاقسارتۋعا باعىتتالعانىن اتاپ وتكىم كەلەدى. ءبىلىم جانە عىلىم مينيسترلىگى قويىلعان مىندەتتەردى ورىنداۋ ءۇشىن بارلىق قاجەتتى جۇمىستى جۇرگىزەدى»، - دەپ تۇيىندەيدى ويىن مينيستر.
ايتا كەتەيىك، 16- قاراشادا وتكەن ۇلتتىق قوعامدىق سەنىم كەڭەسىنىڭ 6-وتىرىسىندا ق ر پرەزيدەنتى قاسىم-جومارت توقايەۆ مەملەكەتتىك ءبىلىم گرانتىنىڭ قاراجاتى ستۋدەنتتىڭ ەسەپشوتىنا ءتۇسۋى تيىستىگىن ايتقان بولاتىن.