بۇعان دەيىن قازاقستاننىڭ كومىرى قۇتقاراتىن. بيىل ول دا جوق. تاسىمال توقتاتىلعان. ەندى بۇل ەلدى ەلەكتر داعدارىسى دىڭكەلەتكەلى تۇر. سونىمەن ۋكراينا كومىر تاپشىلىعىن قالاي شەشپەك؟ ۋكراينا جىلىتۋ ماۋسىمىندا 2,8 ميلليون تونناعا جۋىق ەنەرگەتيكالىق كومىردى تۇتىنادى. الايدا ەنەرگەتيكا جانە كومىر ونەركاسىبى مينيسترلىگىنىڭ مالىمەتى بويىنشا جىلۋ ەلەكتر ستانسيالارىنداعى كومىر قورى بۇگىندە نەبارى 378 مىڭ توننانى عانا قۇراعان. سوندىقتان مەملەكەت كومىر تاپشىلىعىن قاتتى سەزە باستادى جانە ەنەرگەتيكالىق داعدارىس جايلى داۋ قوعامدى سوڭعى اپتادا الاڭداتىپ وتىر.
پرەزيدەنت ۆلاديمير زەلەنسكي وسى ماسەلەگە قاتىستى ارنايى مالىمدەمە جاسادى.
ۆلاديمير زەلەنسكي، ۋكراينا پرەزيدەنتى:
- مەملەكەت كومىر تاپشىلىعىن تاباندىلىقپەن ەڭسەرە باستادى. اتاپ ايتقاندا، ۋكراينالىق كومىردەن بولەك ءبىز پاناماكس كەمەسىمەن جاقىن ۋاقىتتا كومىر جەتكىزەتىن بولامىز. تەڭىز ارقىلى تاسىمالدانعان كومىر بيىلعى جىلدىڭ سوڭىنا دەيىن ەنەرگەتيكا سالاسىنىڭ قاجەتتىلىگىن تولىعىمەن وتەيتىن بولادى.
وسىلايشا ۋكراينا كومىردى امەريكا مەن وڭتۇستىك افريكا ەلدەرىنەن تەڭىز ارقىلى تاسىمالداۋعا ءماجبۇر. اتاپ ءوتۋ كەرەك، ءبىرىنشى قاراشادان باستاپ رەسەي ءوز شەكاراسى ارقىلى ۋكرايناعا قازاقستاندىق كومىر تاسىمالىن تولىعىمەن توقتاتتى.
الەكساندر كاۆا، ۋكراينا قارجى ءمينيسترىنىڭ ورىنباسارى:
- رەسەي تەمىر جولدارى قازاقستان كومىرىن ۋكرايناعا ترانزيتىن قامتاماسىز ەتە الماعاندىقتان ءبىز پولشادان تەمىر جول ارقىلى نەمەسە تەڭىز ارقىلى الەمنىڭ كەز كەلگەن نۇكتەسىنەن ۇلكەن كولەمدەگى كومىر تاسىمالىن قاراستىرىپ جاتىرمىز. بۇل وڭاي ەمەس، تەڭىز ترانسپورتى وتە باياۋ ەكەنىن بىلەسىزدەر.
الەكساندر سيرەنكو، ۋكراينا ەنەرگيا نارىعىنىڭ ساراپشىسى:
- قازىر ونعا جۋىق تانكەر تەڭىز ارقىلى كەلە جاتىر دەگەن اقپارات بار. بۇل شامامەن جارتى ميلليون تونناعا جۋىق كومىر ۋكرايناعا تاسىمالدانادى دەگەن ءسوز. كومىر افريكا ەلدەرى مەن امەريكا قۇراما شتاتتارىنان جەتكىزىلمەك.
ۋكراينا ساراپشىلارىنىڭ بولجامىنا سايكەس، جاقىن ۋاقىتتا ەلدە ەلەكتر ەنەرگياسىنىڭ باعاسى 30 پروتسەنتكە دەيىن ءوسۋى مۇمكىن. بۇعان ەۋرووداقتاعى ەنەرگەتيكالىق داعدارىس، رەسەيدىڭ ءوز شەكاراسى ارقىلى ۋكرايناعا گاز جانە كومىر ترانزيتىنە تىيىم سالۋى جانە جىلۋ ەلەكتر ستانسيالارىنداعى كومىر قورىنىڭ ازايۋى كەرى اسەرىن تيگىزبەك.
www.24.kz