ءومىرزاق شوكەيەۆ «بورتە» سپەكتاكلىنە كەتكەن قاراجات تۋرالى: ءبارى ورنىمەن جۇمسالعان

نۇر- سۇلتان. قازاقپارات - تۇركىستان وبلىسىنىڭ اكىمى ءومىرزاق شوكەيەۆ «بورتە» سپەكتاكلى تۋرالى جۋرناليستەر سۇراعىنا جاۋاپ بەردى، دەپ حابارلايدى قازاقپارات ءتىلشىسى.

ورتالىق كوممۋنيكاتسيالار قىزمەتىندە اكىمگە «بورتە» سپەكتاكلىنە 246 ميلليون تەڭگەنىڭ ءبولىنۋى تىم قىمبات دەپ ويلامايسىز با؟ باسقا قالالاردا وسىنداي قويىلىمدارعا 3-4 ميلليون تەڭگە كەتەدى» - دەگەن سۇراق قويىلدى.

«جوق، ولاي ويلامايمىن. ءبىز بارلىق سمەتانى تەكسەرىپ شىقتىق، وندا ارتىق ەشتەڭە قاراستىرىلماعان. جانە ونىڭ جاڭا تەاتر ەكەنىن ەسكەرسەك، دەكوراتسيا كەرەك، كوستيۋمدار كەرەك، اۆتورلار مەن رەجيسسەردىڭ گونورارىن، اكتەرلەردىڭ ەڭبەكاقىسىن تولەۋ كەرەك - تەكسەرۋ جۇمىستارى كورسەتكەندەي، بارلىق قاراجات ورنىمەن جۇمسالعان. كەرىسىنشە، مەن تۇركىستانعا كەلگەنى ءۇشىن تەاتر ۇجىمىنا العىس ايتقىم كەلەدى. ولاردىڭ بارلىعى ءتۇرلى ەلدەردىڭ استاناسىندا ەڭبەك ەتكەن، العاشقى قويىلىمىنىڭ ءوزىن جوعارى دەڭگەيدە كورسەتتى. تەاتر قالانىڭ باستى ورنىنا اينالدى، تەاتر قويىلىمى ءۇشىن نۇر- سۇلتان مەن الماتىدان ارنايى ۇشىپ كەلەتىن قوناقتار بار. ال 3-4 ميلليون تەڭگەگە قانداي سپەكتاكل قويۋعا بولاتىنىن ەلەستەتە المايمىن»، - دەپ جاۋاپ بەردى ءو. شوكەيەۆ.

ءوڭىر اكىمى جەتەكشى تەاترلار ءۇشىن 200 ميلليون تەڭگەدەن استام قاراجات كوپتىك ەتپەيتىنىن ايتتى.

«كەشە دە بىرنەشە سايت تۇركىستان تەاترىنىڭ ەلورداعا گاسترولىنە 32 ميلليون تەڭگە بولىنەتىنىن جازدى. بۇل سۇراقتى مەن دە قاراستىرىپ كوردىم. بۇل تەاترعا ۇلكەن سۇرانىس بولدى، ەلوردا اكىمدىگىنىڭ ءوزى ۇسىنىس جاسادى. نۇر- سۇلتانداعى تەاتردى ءبىر كۇنگە جالعا الۋدىڭ ءوزى - 8 ميلليون تەڭگە. ەكى كۇن قويىلىم كورسەتۋگە 16 ميلليون تەڭگە كەتەدى. قالعانى تەاتردى استاناعا اكەلۋ، دەكوراتسيالاردى تاسىمالداۋ، ءىسساپارلار مەن قوناقۇيلەرگە جۇمسالادى. جالپى العاندا بۇل سيفرلار اقىلعا قونىمدى. ەگەر قانداي دا ءبىر بۇزۋشىلىقتار بولسا، ونى تەكسەرەتىن ءتيىستى ورگاندار بار. ال نەگىزى وبەكتيۆتى تۇردە قاراۋ كەرەك جانە تۇركىستاندى رۋحاني استانا ەتۋگە جانىن سالىپ جۇرگەندەردىڭ ەڭبەگىن قۇرمەتتەۋ كەرەك»، - دەدى ءو. شوكەيەۆ.

ايتا كەتەيىك، 9-10 - قازان كۇندەرى تۇركىستان مۋزىكالىق دراما تەاترى بەلگىلى دراماتۋرگ، ق ر مەملەكەتتىك سىيلىعىنىڭ لاۋرەاتى دۋلات يسابەكوۆتىڭ پەساسىنا قويىلعان «بورتە» سپەكتاكلىمەن اشىلدى جانە اشلاگپەن ءوتتى.

20-21 - قاراشا كۇندەرى «بورتە» سپەكتاكلى نۇر- سۇلتان قالاسىندا ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا كورسەتىلەدى.

اۆتور: ايجان سەرىكجان قىزى