بۇل تۋرالى وبلىستىق دەنساۋلىق ساقتاۋ باسقارماسى مالىمدەدى، - دەپ حابارلايدى Tengrinews.kz ءتىلشىسى.
ۆەدومستۆو مالىمەتىنشە، تاراز قالالىق اۋرۋحاناسىنا 41 ناۋقاس تۇسكەن. ولاردىڭ تورتەۋى اۋرۋحاناعا جاتقىزىلىپ، قالعاندارى دارىگەر تەكسەرگەننەن كەيىن ۇيىنە جىبەرىلگەن.
ءتورت بالا وبلىستىق بالالار اۋرۋحاناسىنا جاتقىزىلعان، ونىڭ ۇشەۋى ەمدەلۋگە قالىپ، بىرەۋى امبۋلاتورلىق ەم الۋعا ۇيىنە جىبەرىلدى، دەلىنگەن حابارلامادا.
مەديتسينالىق كومەك الۋ ءۇشىن بايزاقوۆ اۋداندىق اۋرۋحاناسىنا دا ءتورت ادام جۇگىنگەن: بىرەۋى اۋرۋحاناعا جاتقىزىلدى، ۇشەۋى دارىگەرلەر باقىلاۋىمەن ۇيىنە شىعارىلعان.
«كومەككە جۇگىنگەن ناۋقاستاردىڭ كوپشىلىگىنىڭ باسى، قولى مەن اياعى كوگەرگەن. سونىمەن قاتار تەرەزە مەن قورشاۋلار قۇلاپ، سالدارىنان باسقا دا جاراقات العاندار بار»، - دەدى ۆەدومستۆو وكىلدەرى.
سونىمەن قاتار، كەيبىر الەۋمەتتىك جەلى قولدانۋشىلارى بۇرىن جاريالانباعان كادرلاردى كورسەتتى. ولاردىڭ بىرىندە ءبىر توپ ادام جەلگە قارسى تۇرا الماي قۇلاپ جاتقانى تۇسىرىلگەن. ولار بولجام بويىنشا وقۋشىلار بولۋى مۇمكىن.
ال تاعى ءبىر ۆيدەو اۆتورى كوپقاباتتى ۇيدەگى پاتەرىن كورسەتەدى. ونىڭ ايتۋىنشا، جەلدىڭ قاتتى بولعانى سونشالىق، بالكونىن ۇشىرىپ اكەتكەن.
بۇعان دەيىن جامبىل وبلىسىنىڭ پوليتسەيلەرى تاسجولعا شىعىپ، بوراندى ۆيدەوعا تۇسىرگەنى حابارلاندى. وسىلايشا، ءتارتىپ ساقشىلارى جۇرگىزۋشىلەرگە اسا قاجەت بولماعان جاعدايدا جولعا شىقپاۋ تۋرالى ەسكەرتۋ جاساۋعا تىرىسقان ەدى. سونداي-اق، جامبىل وبلىسىندا جەل سالدارىنان بىرنەشە ەلدى مەكەندە گاز قۇبىرلارىنا زاقىم كەلگەن ەدى. باسپا ءسوز قىزمەتى مالىمەتىنشە، ەكپىنى كۇشتى جەل ۇيلەردىڭ قورشاۋلارىن ۇشىرىپ، اعاشتاردى قۇلاتقان. سالدارىنان كوشەدەگى گاز قۇبىرلارى ءبۇلىنىپ، تۇرعىندارعا گاز بەرۋ ۋاقىتشا توقتاتىلدى.