عالىمداردىڭ بولجامىنشا، الداعى ون جىلدا ءنىل اتىراۋىنىڭ ۇشتەن ءبىر بولىگىن سۋ باسادى. ال ساياساتكەرلەر ەفيوپيانىڭ وزەن بويىنا سۋ بوگەتىن سالۋدى قاۋىپ كورەدى. الەمنىڭ ەڭ ۇزىن وزەنىنە باستى قاۋىپ عالامدىق جىلىنۋدان ءتونىپ تۇر. دۇنيەجۇزىلىك مۇحيت دەڭگەيىنىڭ كوتەرىلۋى سالدارىنان ءنىل اتىراۋى سۋعا باتىپ، ەگيپەت قۇنارلى جەرىنەن ايىرىلادى. ميلليونداعان ادام باسپاناسىز قالۋى مۇمكىن. ويتكەنى ەلدەگى حالىقتىڭ جارتىسىنان كوبى وسى وزەننىڭ جاعاسىندا تۇرادى.
موحاممەد تاۆفيك، ەگيپەت سۋ قورى مينيسترلىگى ەكولوگيا ءبولىمىنىڭ باسشىسى:
- بۇگىننىڭ وزىندە ەلدىڭ ىشىنە قاراي جارتى ميلليون ادامدى كوشىرۋ قاجەت. مۇنى قازىر ىستەۋ كەرەك، ويتكەنى بولجاۋىمىزشا، 4 جىلدان كەيىن سۋ ەكى جۇزدەن 400 مىڭ شارشى مەترگە دەيىن قۇرلىقتى باسادى. ەگەر وزەندى قۇتقارۋعا كۇش سالساق، ءنىلدى دە، ادامداردى دا قورعاپ قالۋعا بولادى. ايتپەسە ونداعان جىلدان كەيىن ەگيپەتتىڭ بۇكىل حالقىنا سۋدان پانا ىزدەۋگە تۋرا كەلەدى.
ءبىزدىڭ مالىمەتىمىز بويىنشا، 2070 -جىلعا قاراي 6 ميلليون ادامنىڭ ءۇيى سۋ استىندا قالادى. ب ۇ ۇ ءنىل اتىراۋىنىڭ سۋعا باتۋىنا قارسى كۇرەسكە 32 ميلليارد دوللار ءبولدى. ەگيپەت ۇكىمەتى بۇل جوبانىڭ بيۋدجەتىن ەكى ەسە ارتتىرماق. اپتا سوڭىندا پارلامەنت جانىندا وزەندى قۇتقارۋ بويىنشا ارنايى كوميسسيا جۇمىسىن باستايدى. وعان بيلىك وكىلدەرى، عالىمدار، زەرتتەۋشىلەر مەن ينجەنەرلەر كىرەدى. باستى مىندەت - جاڭا سۋ بوگەتتەرىن سالۋ. ياعني حالىقارالىق ۇيىمداردىڭ كومەگىمەن ەسكى بوگەتتەر جاڭارتىلىپ، وزەن جاعالارى بەكىتىلەدى.
حوسسام گازال، ەگيپەت پارلامەنتى جانىنداعى ءنىل وزەنىن قۇتقارۋ كوميسسياسىنىڭ مۇشەسى:
- كوميسسياداعى جەكە ءبىر توپ ەفيوپيادا سالىنىپ جاتقان «جاڭعىرۋ» سۋ بوگەتىن باقىلاۋعا الادى. جاقىن ارادا ونى ءۇشىنشى رەت سۋمەن تولتىراتىنىن بىلەمىز. العاشقى ەكى رەتىندە جالپى كولەمى 18 جارىم ميلليارد تەكشە مەتر سۋ كەتكەن. كورشى مەملەكەتتىڭ بۇل قيمىلى ارامىزداعى كەلىسىمدەردى بۇزۋمەن قاتار، ءنىل قاۋىپسىزدىگىنە قاتەر ءتوندىرىپ وتىر دەپ سانايمىز.
سۋرافەل تيلاحۋن، ينجەنەر:
- وسى سۋ بوگەتى - ەفيوپيانىڭ ۇلى جەتىستىگى. ول ميلليونداعان ادامىمىزدى كەدەيلىكتەن قۇتقارىپ، جارىقسىز اۋدانداردىڭ جارتىسىنان كوبىن ەلەكتر قۋاتىمەن قامتاماسىز ەتەدى. بۇعان تولىق قۇقىعىمىز بار. مەملەكەتىمىز بۇل ماسەلەنى ب ۇ ۇ جانە وزگە دە حالىقارالىق ۇيىمداردىڭ وكىلدەرىمەن تالقىلاعان بولاتىن.
ەگيپەت ءنىلدى تەك وزىنىكى دەپ ساناماۋى ءتيىس. ءبىزدىڭ دە ازاماتتارىمىزعا بۇل وزەن مەن ونىڭ الەۋەتى قاجەت. ب ۇ ۇ قوس تاراپتى كەلىسسوز باستاپ، جىلدىڭ سوڭىنا دەيىن وسى ماسەلەنى شەشۋگە شاقىردى. ال وسى كەزدە ەۋروپالىق وداق ەگيپەت ۇستانىمىن قولداپ وتىر. ەۋروپالىق كومپانيالار كايرگە قايتارىمسىز گرنات رەتىندە 60 ميللياردتاي دوللار ءبولۋدى كوزدەپ وتىر.
www.24.kz