ەركىن ازيا راديوسى ءۇش ساعاتتان استام ۋاقىتقا سوزىلعان ديالوگ جونىندە «بايدەن مەن شي جينپيڭ ۆيدەوسامميتى ءىرى قايشىلىق جاعدايىندا جىلى اتموسفەرادا ءوتتى» دەگەن تاقىرىپتا ماقالا باستى. ەكى باسشى تيبەت، گونكونگ، شىڭجاڭ ماسەلەسىن تالقىلاعان.
ەكى ءىرى دەرجاۆا اراسىنداعى «ساۋدا سوعىسى دا» ايتىلعان. پەكيننىڭ دەموكراتيالىق تايۆان اۋماعىنا قول سۇعۋى دا ءسوز بولعان. قىتاي كوممۋنيستىك پارتياسىنىڭ ادام قۇقىعىن بۇزۋىنا دا نازار اۋدارىلعان.
ساراپشىلار 2021 -جىلى قاڭتاردا دجو بايدەن اق ۇيگە كەلگەلى بەرى ەكى باسشىنىڭ العاش رەت ۇزاق سويلەسكەنىن ايتىپ وتىر.
اق ءۇيدىڭ كەلىسسوز قورىتىندىسى جونىندە تاراتقان مالىمدەمەسىندە ا ق ش ءوز مۇددەلەرى مەن قۇندىلىقتارىن بۇدان ءارى قاراي دا قورعاي بەرەتىنى جازىلعان. ۆاشينگتون وداقتاستارى مەن ارىپتەستەرىمەن بىرگە 21-عاسىردا ەرەجەلەردىڭ ساقتالۋىن قامتاماسىز ەتۋگە كۇش سالادى.
«امەريكا داۋىسى» سايتى بايدەن تايۆان بويىنشا الدىڭعى مالىمدەمەسىن ءسال جۇمسارتقانعا ۇقسايدى دەپ توپشىلايدى. ماسەلەن، اق ءۇي ا ق ش «ءبىر قىتاي» ساياساتىن قولدايدى، تايۆان تاۋەلسىزدىگى مەن «تايۆان بۇعازىندا بەيبىتشىلىك پەن تۇراقتىلىققا نۇقسان كەلتىرەتىن ءبىرجاقتى ارەكەتكە قارسى» دەپ مالىمدەگەن.