پاۆلوداردا تاۋەلسىزدىك كۇنىنە وراي جالپىحالىقتىق كۇي تارتۋ جوباسى باستالدى
ەرەكشە جوبا بۇگىن، 16 - قاراشادا، ساعات 15.00 دە ەستاي اتىنداعى مادەنيەت سارايىندا باستاۋ الدى.
- جوبانىڭ تۇساۋكەسەرىنە ي. بايزاقوۆ اتىنداعى وبلىستىق فيلارمونيا جانە ءوڭىرىمىزدىڭ بارلىق قالا، اۋداندارىنداعى ونەرپازدار ءبىر مەزگىلدە قاتىستى. ازات ەلدىڭ ايبىنىن اسىراتىن ايىرىقشا باستاماعا ءبىر ۋاقىتتا مىڭداعان ادام قاتىسىپ، دالا مەن قالانى ءبىر مەزەتتە دومبىرانىڭ كۇمىس كۇمبىرىنە بولەمەك، - دەدى «JEBE « ق ب مۇشەسى الپىسباي حونج.
جاڭا جوباعا پاۆلودار وبلىستىق مادەنيەت، تىلدەردى دامىتۋ جانە ارحيۆ ءىسى باسقارماسى، سونداي-اق وبلىستىق ءبىلىم بەرۋ باسقارماسى قولداۋ كورسەتۋدە. جوبا باستالعان ساتتە پاۆلودار وبلىسىنىڭ بارلىق قالا، اۋداندارىنداعى جەكە ونەرپازدار، ونەر ۇجىمدارى، مەكتەپ وقۋشىلارى كۇي شەرتتى.
سونداي-اق قازاقستاننان تىس موڭعوليانىڭ بايان-ولگەي قالاسىنان «كۇلتەگىن» ونەر ۇجىمى دا دومبىرالارىن قولىنا الىپ، قولداۋ ءبىلدىردى. قازاقتىڭ تاعدىرىمەن بىتە قايناسقان وسى دومبىرا.
نەگىزگى ماقساتىمىز - قازاقتىڭ دالاسى دومبىرا ۇنىمەن تەربەلىپ تۇرۋى، جاستاردىڭ بويىنا وتانسۇيگىشتىك سەزىمدى دارىتۋ. سوندىقتان تەك وبلىسپەن شەكتەلمەي، ەلىمىزدەگى، جەر بەتىندەگى بارشا قازاقتى وسى باستاماعا قوسىلۋعا شاقىرامىز، - دەدى الپىسباي حونج.
«كۇي كەرۋەنى» جالپىحالىقتىق جوباسى وسى جىلدىڭ 16- قاراشاسى مەن 16- جەلتوقسانى كۇندەرى وتەدى.
شاراعا نيەتتى كەز كەلگەن جان (جەكە ادام، وتباسىمەن بىرگە، ۇجىم بولىپ) قاتىسا الادى.