تۇرىكمەنستاننىڭ سىرتقى ىستەر ءمينيسترى راشيد مەرەدوۆ حالىقارالىق ونلاين-كونفەرەنسيادا وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«تۇرىكمەنستاننىڭ سىرتقى ساياساتىنىڭ ماڭىزدى باعىتتارىنىڭ ءبىرى - ىرگەلەس ورنالاسقان كورشى ەلدەرمەن قارىم-قاتىناستى ودان ءارى دامىتۋ جانە نىعايتۋ. ارينە، تۇرىكمەنستاننىڭ سىرتقى ساياساتىندا قولدانىستاعى ايماقتىق فورماتتار نەمەسە ايماقتىق ۇيىمدار مەن حالىقارالىق قۇرىلىمدار اياسىندا كەڭەيتىلگەن ەكونوميكالىق، الەۋمەتتىك جانە ساياسي ينتەگراتسيا مۇمكىندىكتەرىن كەڭەيتۋ ماڭىزدى ورىن الادى. وزدەرىڭىز بىلەسىزدەر، تۇركى مەملەكەتتەرى ىنتىماقتاستىعى كەڭەسىنىڭ مۇشەلەرى تۇركىمەنستانعا جاقىن ورنالاسقان. ءبىزدى تەرەڭ تاريحي، تىلدىك، ەتنيكالىق، مادەني-گۋمانيتارلىق جاقىندىقتار بايلانىستىرادى. اتالعان كەڭەسكە مۇشە ەلدەرمەن وتە تىعىز ساۋدا-ەكونوميكالىق، كولىك-ەنەرگەتيكالىق ءوزارا ءىس-قيمىل، بىرلەسكەن جوبالار مەن دالىزدەردى قولعا العانبىز. جۋىردا وتكەن تۇركى ەلدەرى مەملەكەت باسشىلارىنىڭ سامميتىنە نەعۇرلىم بەلسەندى قاتىسۋ تۋرالى شەشىمدى ءدال وسىنداي العىشارتتارمەن تۇسىندىرۋگە بولادى»، - دەدى راشيد مەرەدوۆ.
ءمينيستردىڭ ايتۋىنشا تۇرىكمەنستاننىڭ تۇركى كەڭەسىنە باقىلاۋشى ەل رەتىندە كىرۋى - تۇركى مەملەكەتتەرىمەن ءوزارا ءىس- قيمىلدىڭ ساپالى جاڭا كەزەڭىنىڭ باستالۋىن بىلدىرەتىن ماڭىزدى وقيعا.
«بۇگىن ءبىز تۇركى تىلدەس مەملەكەتتەردىڭ ىنتىماقتاستىق كەڭەسى اياسىندا، جاڭا فورمات اياسىندا تۇركى كەڭەسى ەلدەرىمەن ارىپتەستىكتىڭ جاڭا كەزەڭىنە اياق باستىق. سامميت بارىسىندا مەملەكەت باسشىسى ەلىمىزدىڭ وسى ۇيىمعا باقىلاۋشى رەتىندە قاتىسۋى جونىندەگى نەگىزگى ۇستانىمدارىن، سونداي-اق بىرلەسكەن جۇمىسىمىزدىڭ باسىم باعىتتارىن اتاپ ءوتتى. ءبىزدىڭ ەلىمىز باۋىرلاس حالىقتار مەن ەلدەر اراسىنداعى بايلانىستاردى نىعايتۋدى جاقتايدى»، - دەدى تۇرىكمەنستاننىڭ سىرتقى ىستەر ءمينيسترى.