باياۋ ينتەرنەت پەن ساپاسىز بايلانىس ءۇشىن موبيلدى وپەراتورلارعا ايىپپۇل سالىندى
بۇل تۋرالى ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ تەلەكوممۋنيكاتسيا كوميتەتى راديوجەلىلىك سپەكترىن پايدالانۋعا رۇقسات بەرۋ باسقارماسىنىڭ باسشىسى ەرلان دۇيسەن ءمالىم ەتتى، دەپ حابارلايدى قازاقپارات ءتىلشىسى.
«ءبىز وسى كەزگە دەيىن 465 تەكسەرۋ جۇرگىزدىك. سونىڭ ناتيجەسىندە ءموبيلدى بايلانىس وپەراتورلار جۇمىسىنان اقاۋ تابىلىپ، ولارعا 104 ميلليون تەڭگەنىڭ ايىپپۇلى سالىندى. سونىمەن قاتار ءبىز اۋىلداردى ساپالى ينتەرنەت جانە بايلانىسپەن قامتۋ جۇمىسىمەن اينالىسامىز. جىلدام ينتەرنەت جانە ساپالى بايلانىسپەن قامتۋ شاراسىنا قاتىستى تەكسەرۋ جۇمىسىن ودان ءارى جالعاستىراتىن بولامىز. ەگەر بايلانىس وپەراتورلارى اقساي بەرەتىن بولسا، وندا اكىمشىلىك شارا قابىلداپ، قاجەت جاعدايدا قىزمەت كورسەتۋ قۇقىعىنان ايىرۋ قادامىنا دەيىن بارامىز»، - دەدى ەرلان دۇيسەن.
ءوز كەزەگىندە ق ر پارلامەنتى سەناتىنىڭ دەپۋتاتى ەدىل مامىتبەكوۆ تەلەكوممۋنيكاتسيا سالاسىنىڭ جوعارى قارقىنمەن دامىپ جاتقانىن جەتكىزدى.
«مەملەكەت باسشىسى بيىلعى جولداۋىندا سيفرلاندىرۋ سالاسىنىڭ ماڭىزدىلىعىنا ەرەكشە توقتالىپ ءوتتى. باسەكەلەستىكتى دامىتامىز دەسەك، جۇمىس ساپاسىن ارتتىرۋىمىز كەرەك. سونىمەن قاتار پرەزيدەنت ەلدىمەكەندەرگە ينتەرنەت تارتىپ قويماي ونىڭ ساپاسىن رەتتەۋدى تاپسىردى. ودان بولەك، وتاندىق ءىت سالاسى ماماندارىن دايارلاۋ مىندەتىن دە جۇكتەدى. پرەزيدەنت تاپسىرماسىنا سايكەس 100 مىڭ قازاقستاندىق ءىت مامانىن ازىرلەۋ قاجەت. تەلەكوممۋنيكاتسيا زاماناۋي جىلدام دامىپ جاتقان سالانىڭ ءبىرى. وسى تۇرعىدا بىزدە كوشتەن قالماۋىمىز كەرەك»، - دەيدى دەپۋتات.
ايتا كەتسەك، بۇگىن ەلوردادا وتاندىق تەلەكوممۋنيكاتسيا جانە سيفرلاندىرۋ سالاسىنىڭ دامۋ بارىسىنا ارنالعان دوڭگەلەك ۇستەل ءوتتى. اتالعان شاراعا قۇزىرلى مەملەكەتتىك ورگان وكىلدەرىمەن قاتار سالا ماماندارى قاتىستى.
اۆتور: ءالي يبرايەۆ