Sleep Foundation بەيكوممەرتسيالىق ۇيىمىنىڭ مالىمەتى بويىنشا، Covid-19 پاندەمياسىنىڭ سەبەبىنەن پايدا بولعان كۇيزەلىس كوپشىلىكتىڭ ازىراق ۇيىقتاۋىنا نەمەسە ءتىپتى، ۇيقىسىزدىقپەن قينالالۋىنا اكەلگەن. بۇل فەنومەن «كوروناسومنيا» دەگەن اتاۋ الدى. ەندەشە، 6 ساعاتتان از ۇيىقتاۋدىڭ اعزاعا قانداي زيانى بار؟
ۇيقى بويىنشا ەكسپەرت ءارى دارىگەر رەبەككا ءروببينستىڭ ايتۋىنشا، كۇندە ءبىر ساعاتقا از ۇيىقتاۋدىڭ ءوزى سيركادتى ىرعاقتى بۇزۋ ءۇشىن جەتكىلىكتى. بۇل ءوز كەزەگىندە پسيحيكالىق اۋرۋلاردىڭ، سەمىزدىكتىڭ جانە التسگەيمەر اۋرۋىنىڭ پايدا بولۋ قاۋپىن ارتتىرادى. سونداي- اق ۇيقىنىڭ قانباۋى جۇرەك پروبلەمالارى مەن يممۋنيتەتتىڭ تومەندەۋىنە اكەلەتىنىن دالەلدەيتىن زەرتتەۋلەر بار.
«مي كۇنى بويى السگەيمەر اۋرۋىنا نەمەسە دەمەنتسياعا اكەلۋى مۇمكىن توكسيندەردى بولەتىنىن انىقتادىق، — دەيدى دارىگەر رەبەككا روببينس. — ءبىز ۇيىقتاپ جاتقاندا مي بۇل توكسيندەردى ءبولۋدى توقتاتىپ قانا قويماي، ميدى شاياتىن جانە جينالعان توكسيندەردى جوياتىن تسەرەبرال سۇيىقتىقتى وڭدەپ شىعارادى».
سونداي- اق ماماننىڭ ايتۋىنشا، تاۋلىگىنە قاجەتتى 7-10 ساعات ۇيىقتايتىن ادامدارعا قاراعاندا از ۇيىقتايتىنداردىڭ تۇماۋمەن اۋىرۋ قاۋپى ەكى ەسە جوعارى.
سونىمەن قاتار، ۇيقى ساپاسى ادامنىڭ Covid-19 ۆاكسيناسىن قانشالىقتى جاقسى كوتەرەتىنىنە تىكەلەي اسەر ەتەدى.
«ۆاكسينا العان ادامداردىڭ اعزاسى ۆيرۋسپەن كۇرەسەتىن انتيدەنەلەر وڭدەپ شىعارادى. ەگەر ۆاكتسينانى دۇرىس ۇيقى ۇزاقتىعىمەن ۇيلەستىرسەڭىز، انتيدەنەلەردىڭ ءبولىنۋى جىلدامداي تۇسەدى»، — دەيدى دارىگەر.
ۇيقىنى رەتكە كەلتىرۋ ءۇشىن دارىگەر رەبەككا بىرنەشە پايدالى ارەكەتتەردى ادەتكە اينالدىرۋدى ۇسىنادى. بىرىنشىدەن، توسەككە كۇندە ءبىر ۋاقىتتا جاتىڭىز. ەكىنشىدەن، ۇيىقتاۋعا ەڭ بولماعاندا 30 مينۋت قالعاندا گادجەتتەردىڭ ءبارىن ءسوندىرىڭىز. گادجەت قاراۋدىڭ ورنىنا كىتاپ وقىعان نەمەسە تىنىس الۋ جاتتىعۋلارىن جاساعان ءجون. ەگەر ءتۇن ورتاسىندا ويانىپ كەتىپ، ارى قاراي ۇيىقتاي الماساڭىز، توسەكتە جاتپاي، ورنىڭىزدان تۇرىپ، مەديتاتسيا جاساۋ كەرەك. دارىگەردىڭ ايتۋىنشا، مەديتاتسيا توسەكتەن جاتقاننان گورى جىلدام ۇيىقتاپ كەتۋگە كومەكتەسەدى ەكەن.