«احۋالدى وزدەرىڭىز دە جاقسى بىلەسىزدەر. ءبىز ونى جاقسارىپ كەلەدى دەپ سانايمىز. بۇگىندە «قىزىل» ايماقتا ەكى ءوڭىر عانا قالىپ وتىر. ولار: پاۆلودار مەن سولتۇستىك قازاقستان وبلىستارى»، - دەدى ۇكىمەت باسشىسى ب ا ق وكىلدەرىمەن كەزدەسۋ بارىسىندا.
پرەمەر-مينيستر دەرەگىنشە، بۇگىندە ەلىمىزدە 8 ميلليون 880 مىڭ ادام كوروناۆيرۋسقا قارسى ۆاكسينانىڭ ءبىرىنشى كومپونەنتىمەن، ال 7 ميلليون 800 مىڭ ادام ەكىنشى كومپونەنتىمەن ەگىلگەن.
«بۇل تاۋەلسىز مەملەكەتتەر دوستاستىعىنداعى ەڭ جوعارى كورسەتكىش. قازىر ۆاكسينا الاتىن ازاماتتاردىڭ ساناتىن كەڭەيتتىك. ولار: ەمىزۋلى بالاسى بار جانە جۇكتى ايەلدەر، سونىمەن قاتار 12 مەن 18 جاستاعى مەكتەپ وقۋشىلارى. Pfizer ۆاكسيناسى جەتكىزىلدى. مۇنىڭ بارلىعى دا بىزگە قازىرگى سانيتارلىق-ەپيدەميولوگيالىق احۋالدى وسى دەڭگەيدە ۇستاپ تۇرۋعا مۇمكىندىك بەرەدى»، - دەدى اسقار مامين.
ونىڭ اتاپ وتۋىنشە، اۋرۋحانالارداعى توسەك-ورىنعا، جالپى دەنساۋلىق ساقتاۋ سالاسىنا جۇكتەمە تومەندەپ وتىر. بۇگىندە ەلىمىزدەگى ينفەكسيالىق اۋرۋحانالار 30، ال رەانيماتسيالىق توسەك-ورىندار 27 پايىزدىق جۇكتەمەمەن جۇمىس ىستەپ تۇر.
«بۇگىندە احۋال تۇراقتاندى دەپ سانايمىز. جوعارىدا اتاپ وتكەن ەكى ءوڭىر قازىرگى قارقىنمەن جۇرە بەرسە، وندا «قىزىل» ايماقتان شىعۋى ءتيىس دەپ ەسەپتەيمىز. وسىلايشا، بۇكىل قازاقستان قولايلى سانيتارلىق جاعدايدا بولادى»، - دەدى پرەمەر-مينيستر.