جانە جاس انا ءوزىن جاقسى سەزىنەتىنىن ايتتى، حابارلايدى قازاقپارات ءتىلشىسى.
«مەنىڭ جاسىم 26 دا، 7 ايلىق بالام بار، ياعني ەمىزۋلى انامىن. كوروناۆيرۋسپەن الەم بولىپ كۇرەسىپ جاتقانىن جانە ونىڭ قانشالىقتى تەز تارايتىنىن ءبارىمىز ءبىلىپ وتىرمىز. وسى ورايدا ءوزىم ءۇشىن عانا ەمەس، بالامنىڭ دا قاۋىپسىزدىگى ءۇشىن الدىم. نەگىزى كوروناۆيرۋسقا قارسى ۆاكسينانى قازاقستانعا العاش الىپ كەلگەندە-اق سالدىرعىم كەلگەن، مەن ول كەزدە جۇكتى بولعاندىقتان رۇقسات بەرىلمەدى. كەيىن ەلىمىزگە Pfizer ەكپەسىن اكەلەدى جانە ونى ەمىزۋلى انالارعا الۋعا بولادى دەگەن حاباردى ەستىدىم. Pfizer جەتكىزىلگەن سوڭ ەمحاناعا حابارلاسىپ، مىنە، بۇگىن الىپ وتىرمىن. مەندە اتالعان ىندەتتىڭ العاشقى سيمپتومدارى بولدى، ءبىراق اۋىرعان ەمەسپىن»، - دەدى الفيا الىبەكوۆا.
ونىڭ ايتۋىنشا، جاقىندارى مەن تۋىستارىنىڭ دەنى ەكپە سالدىرعان.
«ارينە، ۆاكسينا الماس بۇرىن دارىگەرلەردەن، ونىڭ ىشىندە پەدياتردان كەڭەس الدىم. جانە ماعان ۆاكسينا الۋعا قاتىستى ەش قىسىم نەمەسە ۇگىت بولعان جوق. ءوز ەركىممەن الىپ جاتىرمىن. قازىر ءوزىمدى ادەتتەگىدەي سەزىنىپ تۇرمىن، بالامدى ەمىزۋدى جالعاستىرامىن. باسىندا قالاي بولادى ەكەن، اۋىرماي ما دەگەن ۇرەيدىڭ بولعانى راس. Pfizer سالدىرعان سەبەبىم - بالا ەمىزەتىن اناعا رۇقساتى بار، ايتپەسە QazVac سالدىرسام دەگەم. سەبەبى ءوز باسىم وتاندىق عالىمدارعا سەنەمىن. ءوزىم سەكىلدى ەمىزۋلى انالارعا ۆاكسينا الۋعا كەڭەس بەرەمىن»، - دەيدى ول.
بۇعان دەيىن ءبىرىنشى بولىپ ۆاكسينا العان استانالىق جاس ءوسپىرىم تۋرالى حابارلاعان ەدىك.
اۆتور: ءالي يبرايەۆ