«تۇركىستان داۋىسى» ەسترادالىق ءان بايقاۋى جاس تالانتتاردىڭ جۇلدىزىن جاقتى
ەكى كۇنگە سوزىلعان ونەر دوداسىنا ەلىمىزدىڭ تۇپكىر- تۇپكىرىنەن 18 بەن 35 جاس ارالىعىنداعى 17 ءانشى قاتىستى. شىعارماشىل، دارىندى جاستاردى انىقتاپ، ولارعا قولداۋ كورسەتۋ ماقساتىندا وتكەن بايقاۋ جاس تالانتتاردىڭ جۇلدىزىن جارقىراتتى. بايقاۋعا كومپوزيتور، ق ر مەملەكەتتىك سىيلىعىنىڭ لاۋرەاتى، تولەگەن مۇحامەدجانوۆ، ق ر ەڭبەك سىڭىرگەن قايراتكەرى، حالىقارالىق ءان بايقاۋلارىنىڭ جۇلدەگەرى مارجان اراپبايەۆا، «مادەنيەت سالاسىنىڭ ۇزدىگى»، كومپوزيتور، پروديۋسەر قايرات باەكەنوۆ، كومپوزيتور، ءان وڭدەۋشى حاميت شانعاليەۆ، حالىقارالىق «سلاۆيان بازارى» فەستيۆالىنىڭ گران- پري يەگەرى، ءانشى رۋحيا بايدۋكەنوۆا، ەسترادا جۇلدىزدارى ايدار تۇرعانبەك پەن جانار دۇعالوۆا قازىلىق جاسادى.
سونىمەن بىرگە الەمگە ايگىلى وپەرا ءانشىسى نۇرجامال ۇسەنبايەۆا قوناق رەتىندە قاتىسىپ، جاس انشىلەرگە قولداۋ كورسەتتى. ەلىمىزدىڭ ءار قيىرىنان كەلگەن قاتىسۋشىلار ەكى ءان ورىندادى. ياعني، ءبىرىنشى قازاقستاننىڭ تانىمال كومپوزيتورلارىنىڭ اندەرىن، ەكىنشى كەزەكتە ءوز تاڭداۋى بويىنشا شىرقادى. ەكى كۇنگە سوزىلعان ءان بايقاۋىنىڭ قورتىندى كەزەڭىنە تۇركىستان وبلىسىنىڭ اكىمى ءومىرزاق شوكەيەۆ پەن جامبىل وبلىسىنىڭ اكىمى بەردىبەك ساپاربايەۆ ارنايى قاتىستى. كەشتىڭ گالا- كونسەرتى وتە جوعارى دەڭگەيدە ءوتىپ، تۇركىستاننىڭ ونەرسۇيەر قاۋىمى مەن قوناقتارى ءبىر سەرپىلىپ قالدى.
بايقاۋ قورتىندىسى بويىنشا گران- پري جۇلدەسىن تۇركىستان وبلىسىنىڭ جاس ءانشىسى ايزادا الىمبەك جەڭىپ الدى. ءبىرىنشى ورىنعا جامبىلدىق قىمبات جامبىلبەك لايىق دەپ تانىلسا، ماڭعىستاۋلىق ايىن جۇمابايەۆ ەكىنشى ورىنعا يە بولدى.
قايرات سارىبايەۆ (الماتى وبلىسى)، اكىمحان ماجەنوۆ (قوستاناي) جانە اينۇر نازاربەكوۆا (شىمكەنت) سىندى جاس انشىلەر ءۇشىنشى ورىنداردى ەنشىلەدى. جەڭىمپاز بەن جۇلدەگەرلەرگە ديپلوم جانە باعالى سىيلىقتار تاپسىرىلدى.