بۇل تۋرالى قازاقپارات جوعارى پالاتانىڭ باسپا ءسوز قىزمەتىنە سىلتەمە جاساپ حابارلايدى.
كەزدەسۋ بارىسىندا ماۋلەن اشىمبايەۆ پونتيفيككە قازاقستان پرەزيدەنتى قاسىم- جومارت توقايەۆتىڭ اتىنان الەمدىك جانە ءداستۇرلى دىندەر ليدەرلەرىنىڭ VII سەزىنە شاقىرۋ حاتىن تابىس ەتتى. سۇحبات كەزىندە سەنات سپيكەرى قازاقستاننىڭ كونفەسسياارالىق كەلىسىمدى نىعايتۋعا جانە جاھاندىق ءدىنارالىق ديالوگتى ىلگەرىلەتۋگە باعىتتالعان باستامالارى تۋرالى ايتىپ، ولاردىڭ ۆاتيكاننىڭ قىزمەتىمەن تىعىز بايلانىستى ەكەنىنە نازار اۋداردى.
«ەتنوسارالىق بەيبىتشىلىك جانە كەلىسىم، ءار ازاماتتىڭ ءدىني كوزقاراسىنا دەگەن قۇرمەت قازاقستاندىق مادەنيەت پەن مەنتاليتەتتىڭ اجىراماس بولشەگى. ءبىز تولەرانتتىلىقتى ساقتاۋعا جانە ونى دارىپتەۋگە باسا ءمان بەرىپ كەلەمىز. سول سەبەپتى، ءبىزدىڭ تۇڭعىش پرەزيدەنتىمىز نۇرسۇلتان نازاربايەۆ 2003 -جىلى الەمدىك جانە ءداستۇرلى دىندەر ليدەرلەرىنىڭ سەزىن شاقىرۋ تۋرالى باستاما كوتەردى. بۇل فورۋمنىڭ جۇمىسىن دامىتۋعا سەزد حاتشىلىعىنىڭ باسشىسى رەتىندە ق ر پرەزيدەنتى قاسىم- جومارت توقايەۆ ايتارلىقتاي ۇلەس قوستى»، - دەدى ماۋلەن اشىمبايەۆ.
سونداي- اق، ول ۆاتيكاننىڭ ەلىمىزدىڭ اتالعان باستاماسىنا قولداۋ كورسەتىپ كەلە جاتقانى ءۇشىن العىس ءبىلدىردى.
«قازاقستان ۇيىتقى بولعان ءدىنارالىق فورۋم 18 جىلدىڭ ىشىندە مازمۇندى ديالوگ قۇراتىن اشىق الاڭعا اينالدى. وسى مۇمكىندىكتى پايدالانا وتىرىپ، قازاقستاننىڭ باستاماسىنا قولداۋ كورسەتىپ كەلە جاتقانى ءۇشىن قاسيەتتى تاققا العىسىمدى بىلدىرەمىن. بۇعان دەيىن الەمدىك جانە ءداستۇرلى دىندەر ليدەرلەرىنىڭ التى سەزى وتكىزىلدى. سونىڭ بارىنە كاتوليك شىركەۋىنىڭ جوعارى لاۋازىمدى وكىلدەرى بەلسەندى تۇردە قاتىسىپ كەلەدى»، - دەدى سەنات ءتوراعاسى.
الداعى سەزدە پاندەميادان كەيىنگى كەزەڭدە ادامزاتتىڭ رۋحاني- الەۋمەتتىك دامۋىنداعى الەمدىك جانە ءداستۇرلى دىندەر ليدەرلەرىنىڭ ءرولىن تالقىلاۋ جوسپارلانىپ وتىر. وسىعان وراي تاراپتار ءدىن قايراتكەرلەرى پاندەميامەن جانە ونىڭ الەۋمەتتىك- ەكونوميكالىق جانە گۋمانيتارلىق سالدارىمەن كۇرەسكە ۇلكەن ۇلەس قوسا الاتىنىنا سەنىم ءبىلدىردى.
«پاندەميادان ساباق الۋعا، ونىڭ سالدارىمەن كۇرەسكە ءدىن ليدەرلەرىنىڭ قوسار ۇلەسى مول. بۇكىل الەمدى شارپىعان ىندەت ادامزاتتىڭ قوردالانعان پروبلەمالارىن ودان ءارى ۋشىقتىرىپ جىبەردى. ولاردىڭ قاتارىندا كەدەيشىلىك، تەڭسىزدىك، كوپتەگەن ەلدەگى دەنساۋلىق ساقتاۋ جۇيەسىنىڭ مۇشكىل جاعدايى، ادامداردىڭ ءبىلىم دەڭگەيىنىڭ تومەندىگى، ەكولوگيا جانە تاعى باسقا وزەكتى ماسەلەلەر بار. سونداي- اق پاندەميادان ەيىنگى كەزەڭدە تۇتىنۋشىلىق باسىمدىقتار قايتا قارالىپ، رۋحاني جانە ادامگەرشىلىك قۇندىلىقتار ءبىرىنشى ورىنعا شىعۋعا ءتيىس»، - دەدى ماۋلەن اشىمبايەۆ.
ريم پاپاسى فرانسيسك قازاقستان پرەزيدەنتى قاسىم- جومارت توقايەۆقا كەلەسى جىلى قىركۇيەكتە وتەتىن الەمدىك جانە ءداستۇرلى دىندەر ليدەرلەرىنىڭ VII سەزىنە قاتىسۋعا قازاقستانعا شاقىرعانى ءۇشىن العىسىن ءبىلدىردى. سونداي- اق پونتيفيك ەلباسىنىڭ سەزدى شاقىرۋ تۋرالى باستاماسىنىڭ ماڭىزدى ەكەنىنە نازار اۋدارىپ، قازاق ەلىنىڭ جاھاندىق ءدىنارالىق ديالوگتى دامىتۋعا ايتارلىقتاي ءرول قوسىپ وتىرعانىن اتاپ ءوتتى.
سۇحباتتاسۋشىلار حالىقارالىق كۇن تارتىبىندەگى ماڭىزدى ماسەلەلەردى دە تالقىلادى. اتاپ ايتقاندا، اۋعانستانداعى جاعدايعا، جاھاندىق كليماتتىڭ وزگەرۋىنە جانە تاعى باسقا تۇيتكىلدەرگە نازار اۋداردى. بۇدان باسقا، ماۋلەن اشىمبايەۆ بۇگىن ۆاتيكاننىڭ مەملەكەتتىك حاتشىسى پەترو پارولينمەن كەزدەسىپ، قازاقستان مەن ۆاتيكان اراسىنداعى ىنتىماقتاستىق ماسەلەلەرىن ءسوز ەتتى. سونىمەن بىرگە قازاقستان سەناتىنىڭ ءتوراعاسى ساپار اياسىندا پاپا كەڭەسىنىڭ ءدىنارالىق ديالوگ جونىندەگى پرەزيدەنتى كاردينال ميگەل انحەل ايۋسو گيكسوتپەن كەزدەستى.