الماتىدا «ماڭگىلىك ەل» ساعاتى اشىلدى
ارحيتەكتۋرالىق نىسان ءال-فارابي اتىنداعى قازاق ۇلتتىق ۋنيۆەرسيتەتىنىڭ قالاشىعىندا ورناتىلدى.
بۇل ۋنيۆەرسيتەتتىڭ 1985-جىلعى تۇلەكتەرىنىڭ تاۋەلسىزدىكتىڭ 30 جىلدىعىنا وراي ۋنيۆەرسيتەتكە جاساعان تارتۋى بولدى.
ساعاتتىڭ اشىلۋ سالتاناتىنا قازاقستان رەسپۋبليكاسى كونستيتۋتسيالىق كەڭەسىنىڭ ءتوراعاسى، تۇلەكتەر قاۋىمداستىعىنىڭ پرەزيدەنتى قايرات ءمامي، قازاقستان رەسپۋبليكاسى جوعارعى سوتىنىڭ قىلمىستىق ىستەر جونىندەگى سوت القاسىنىڭ ءتوراعاسى ءابدىراشيت جۇكەنوۆ، قاز ۇ ۋ رەكتورى جانسەيىت تۇيمەبايەۆ، مەملەكەت جانە قوعام قايراتكەرى ولجاس سۇلەيمەنوۆ، قاز ۇ ۋ تۇلەكتەرى، زيالى قاۋىم وكىلدەرى، دەمەۋشىلەر، ستۋدەنتتەر قاتىستى.
شارا بارىسىندا ءسوز سويلەگەن ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى جانسەيىت تۇيمەبايەۆ ساعاتتىڭ نەلىكتەن «ماڭگىلىك ەل» دەپ اتالۋىنا توقتالدى.
«ەلباسى نۇرسۇلتان نازاربايەۆ «ماڭگىلىك ەل» يدەياسىندا ناقتىلاپ كورسەتكەندەي، تاۋەلسىزدىكپەن بىرگە حالقىمىز ماڭگىلىك مۇراتىنا قول جەتكىزدى. ماڭگىلىك ەل بولۋ - ءبىزدىڭ باستى ماقساتىمىز. وسى ورايدا 2016-جىلى ۋنيۆەرسيتەتىمىزدە «ماڭگىلىك ەل» سالتانات قاقپاسى اشىلعان بولاتىن. سول قاقپادان باستاپ «ماڭگىلىك ەل» ورتالىق اللەياسى ۇلاسىپ جاتىر. ال، قازىرگى اشىلىپ جاتقان ساعات ستەللاسى وسى باستامالاردىڭ جالعاسى دەپ بىلەمىز. بارشالارىڭىزدى بۇگىنگى «ماڭگىلىك ەل» ساعات ستەلاسىنىڭ سالتاناتتى تۇردە اشىلۋىمەن قۇتتىقتايمىن»، - دەدى رەكتور.
ق ر كونستيتۋتسيالىق كەڭەسىنىڭ ءتوراعاسى، تۇلەكتەر قاۋىمداستىعىنىڭ پرەزيدەنتى قايرات ءمامي جوبانىڭ ماقساتى - قاز ۇ ۋ قالاشىعىنىڭ تۇرعىندارى مەن قوناقتارى ءۇشىن جايلى ورتا قۇرۋ ەكەنىن ايتتى.
«بۇگىنگى كۇنى قازاق ۇلتتىق ۋنيۆەرسيتەتى قالاشىعىنىڭ كوركەيۋىنە ۇلەس قوسۋ ماقساتىندا كوپتەگەن نىساندار بوي كوتەردى. وسى ساعات ستەلاسى دا تۇلەكتەر قاۋىمداستىعىنىڭ باستاۋىمەن جۇزەگە اسىپ وتىر. جاسالعان جۇمىستاردى مەن ماقتانىشپەن ايتا الامىن»، - دەدى قايرات ءمامي.
سونداي-اق، شاراعا ارنايى قاتىسقان قازاقستاننىڭ مەملەكەت جانە قوعام قايراتكەرى ولجاس سۇلەيمەنوۆ، ەلگە تانىمال قاز ۇ ۋ تۇلەكتەرى: ق ر جوعارعى سوتىنىڭ قىلمىستىق ىستەر جونىندەگى سوت القاسىنىڭ ءتوراعاسى ءابدىراشيت جۇكەنوۆ پەن بيولوگيا عىلىمدارىنىڭ دوكتورى سالتانات بايقوشقاروۆا قۇتتىقتاۋ سوزدەر سويلەپ، لەبىزدەرىن ءبىلدىردى.
ايتا كەتەيىك، «ماڭگىلىك ەل» ساعاتى بيىكتىگى 19,3 مەتر ستەلاعا، ستۋدەنتتەردىڭ ءجيى جۇرەتىن جولعا ورناتىلدى.
نىسان قۇرىلىسىنىڭ نەگىزگى ىرگەتاسى ءتورت تۇعىرلى بيىك باعانالارمەن بەكىتىلگەن.