بۇل سۇراققا ق ر ەنەرگەتيكا ءمينيسترىنىڭ ءبىرىنشى ورىنباسارى مۇرات جورەبەكوۆ جاۋاپ بەردى، دەپ حابارلايدى قازاقپارات ءتىلشىسى.
«ەلەكتر ەنەرگياسىن تۇتىنۋعا قاتىستى ستاتيستيكاعا سۇيەنسەك، سوڭعى جىلدارى سۇرانىس ارتقانى بايقالادى. ياعني ەلەكتر ەنەرگياسىن تۇتىنۋ ءار جىل سايىن 1-2 پايىزعا ءوسىپ وتىر. اسىرەسە بيىل 10 ايدىڭ ىشىندە تۇتىنۋ كورسەتكىشى كۇرت ارتتى، 8 پايىزدى قۇرادى. بۇل جەردە اڭگىمە 1000-12000 مۆت ەلەكتر ەنەرگياسى تۋرالى بولىپ وتىر. بۇل جايتتى ءبىز ماينەرلەرمەن بايلانىستىرىپ وتىرمىز. بۇگىندە ەلىمىزدە 50 گە جۋىق ماينينگتىك داتا ورتالىعى بار. جالپى ماينينگتىك ۇيىمدارعا ارتاتىن كىنا جوق، دەگەنمەن وتاندىق نارىقتا كولەڭكەلى ماينينگتىك قىزمەتپەن اينالىساتىن كومپانيالاردىڭ بارىن دا جاسىرماۋ كەرەك. جانە ولاردىڭ ۇلەسى جىل سايىن ارتىپ كەلەدى»، - دەدى مۇرات جورەبەكوۆ و ك ق- دە وتكەن باسپا ءسوز ءماسليحاتىندا.
وسى ورايدا ۆيتسە-مينيستر كولەڭكەلى ماينينگتىك كومپانيالارعا قارسى كۇرەس جۇرگىزىلەتىنىن ەسكە سالدى. سونداي-اق، م. جورەبەكوۆ «ەلىمىزدە ەلەكتر ەنەرگياسى تاپشىلىعى تۋىنداۋى مۇمكىن بە؟» دەگەن ساۋالعا قاتىستى پىكىر ءبىلدىردى.
«جوق، ءبىز تاپشىلىقتىڭ تۋىنداۋىن كورىپ تۇرعان جوقپىز. ەلىمىزدە ەلەكتر ەنەرگياسى جۇيەسى تۇراقتى، دەگەنمەن تۇتىنۋدىڭ ارتۋىنا بايلانىستى الدىن الۋ شاراسىن قابىلداعان ءجون. جانە باعا تۇراقتىلىعى دا نازاردا بولۋى ءتيىس. سونىمەن قاتار زاڭسىز جۇمىس ىستەيتىن ماينينگتىك ۇيىمداردىڭ ماسەلەسىن قولعا الۋ كەرەك. ەلەكتر ەنەرگياسىن اۋقىمدى كولەمدە قولداناتىن سولار»، - دەپ جاۋاپ بەردى ءمينيستردىڭ ءبىرىنشى ورىنباسارى.
ونىڭ ايتۋىنشا، 1000-1200 مۆت ەلەكتر ەنەرگياسىن ءوندىرۋ ءۇشىن 5 جىل ۋاقىت جانە 1-1,5 ميلليارد ا ق ش دوللارى كولەمىندە قارجى كەرەك ەكەن.
بۇعان دەيىن ەلىمىزدە بەنزين باعاسىنىڭ وسۋىنە نەگىز جوق ەكەنى ايتىلدى.