ورتالىق كوممۋنيكاتسيالار قىزمەتىندە ءوتىپ جاتقان باسپا ءسوز ءماسليحاتىندا ءتىلشى «قازاقستاندىق تاۋار تاسىمالداۋشىلار قىتايمەن شەكارادا تۇرىپ قالدى. ولاردى شەكارادان وتكىزبەي جاتىر، سەبەبى نەدە جانە ماسەلە قالاي شەشىلمەك؟» دەگەن ساۋال قويىلدى.
بۇل سۇراققا ق ر ساۋدا جانە ينتەگراتسيا ۆيتسە- ءمينيسترى ەرجان قازانبايەۆ جاۋاپ بەردى. «قىتايمەن شەكاراداعى جاعداي اسا ماڭىزدى. ءيا، ءبىز ماسەلەنىڭ بارىن كورىپ وتىرمىز. جانە ول كوروناۆيرۋسپەن بايلانىستى، پاندەميانىڭ سالدارىنان قىتاي شەكاراسىن جاۋىپ، تاۋار الماسۋدى توقتاتىپ جاتىر. تاۋاردى شەكارادان وتە قاتاڭ تارتىپپەن وتكىزىپ جاتىر، وسى سەبەپتى تاسىمالداۋشىلار شەكارادا تۇرىپ قالۋدا. وسى ورايدا وتاندىق بيزنەسكە قولداۋ كورسەتىپ، شەكاراداعى ماسەلەنى شەشۋ ماقساتىندا ءبىز قىتايلىق سەرىكتەستەرمەن كەلىسىم جۇرگىزىپ جاتىرمىز. ياعني شەكارا ارقىلى تاۋار تاسىمالى پرەتسەسىن جەڭىلدەتۋ ءۇشىن. ىندەتتىڭ بەتى قايتپايىنشا قىتايدىڭ شەكاراسىن اشۋى ەكىتالاي»، - دەدى ەرجان قازانبايەۆ.
ونىڭ ايتۋىنشا، ەپيدجاعداي رەتتەلسە قىتاي مەملەكەتى ءوز شەكاراسىن اشا باستايدى. ايتا كەتسەك، ورتالىق كوممۋنيكاتسيالار قىزمەتىندە ورنىقتى ەكونوميكالىق ءوسۋ، وڭىرلەر مەن بيزنەستى دامىتۋ جونىندەگى ۇلتتىق جوبالاردى ىسكە اسىرۋ بارىسىنا ارنالعان باسپا ءسوز ءماسليحاتى ءوتىپ جاتىر.
اۆتور: دۋمان ارعىنگەلدى