شەتەلدىك ج و و- دا قازاق ءتىلىن وقىتۋ ورتالىقتارى اشىلدى

نۇر-سۇلتان. قازاقپارات - قازاقستاندىق جوعارى وقۋ ورىندارى شەتەلدە قازاق ءتىلىن وقىتۋ ورتالىقتارىن اشىپ جاتىر.

ولار قازىردىڭ وزىندە تۇركيا، يران، پولشا، وڭتۇستىك كورەيا، بەلارۋس، قىتاي جانە وزبەكستان سياقتى ەلدەردە جۇمىس ىستەيدى، - دەپ حابارلايدى ق ر ب ع م باسپا ءسوز قىزمەتى.

شەتەلدىك جوعارى وقۋ ورىندارىمەن ىنتىماقتاستىق اياسىندا وسىنداي ءتىل ورتالىقتارىنىڭ جۇمىس ىستەۋى شەتەلدىك ستۋدەنتتەردىڭ قازاق ءتىلىن وقىپ، قازاق حالقىنىڭ مادەنيەتى مەن تاريحىمەن تانىسۋىنا ارنالعان.

مىسالى، بەلارۋس ۇلتتىق تەحنيكالىق ۋنيۆەرسيتەتىندە ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى اشقان اباي اتىنداعى قازاق ءتىلى، تاريحى جانە مادەنيەتى ورتالىعى جۇمىس ىستەيدى. قازاقستاندىقتار شەتەلدىك ستۋدەنتتەرگە قازاق ءتىلىن ۇيرەتىپ، ۇلتتىق سالت- داستۇرلەر تۋرالى ايتىپ بەرەدى. ءتۇرلى بايقاۋلار، فەستيۆالدار، كورمەلەر جانە باسقا دا ءىس-شارالار وتكىزىلەدى. سونىمەن قاتار ەۇۋ م. تانك اتىنداعى بەلارۋس مەملەكەتتىك پەداگوگيكالىق ۋنيۆەرسيتەتىندە بەلارۋس- قازاقستان مادەني- ءبىلىم بەرۋ ورتالىعىن اشتى.

«ل. ن. گۋميلەۆ اتىنداعى ە ۇ ۋ بازاسىندا قازاق- بەلارۋس عىلىمي- تەحنيكالىق ىنتىماقتاستىق ورتالىعى جۇمىس ىستەيدى، ونىڭ جانىندا «بەلارۋس» ءتىل جانە مادەنيەت ورتالىعى اشىلدى. ورتالىقتار جوعارى وقۋ ورىندارى اراسىنداعى حالىقارالىق عىلىمي جانە مادەني بايلانىستاردى دامىتىپ، بەلارۋس پەن قازاقستان ستۋدەنتتەرى اراسىنداعى دوستىقتى نىعايتادى. ەۋرازيا ۇلتتىق ۋنيۆەرسيتەتى قازاقستان رەسپۋبليكاسى مەن بەلارۋس رەسپۋبليكاسى جوعارى وقۋ ورىندارىنىڭ عىلىمي- ءبىلىم بەرۋ كونسورتسيۋمىنىڭ قىزمەتىن ۇيلەستىرەتىن باستى ۇيىم بولىپ تابىلادى»، - دەدى ل. ن. گۋميلەۆ اتىنداعى ە ۇ ۋ رەكتورى، باسقارما ءتوراعاسى ەرلان سىدىقوۆ.

«ە ۇ ۋ باستاماسىمەن يرانداعى اللامە تاباتاباي ۋنيۆەرسيتەتىندە يران- قازاقستان مادەني- ءبىلىم بەرۋ ورتالىعى اشىلدى. ورتالىق بىرلەسكەن باعدارلامالاردى ىلگەرىلەتۋدى، بىرلەسكەن عىلىمي ەڭبەكتەر مەن زەرتتەۋلەردى جاريالاۋدى، جوعارى وقۋ ورىندارى اراسىندا حالىقارالىق ءىس- شارالاردى وتكىزۋدى ۇيلەستىرەدى. ە ۇ ۋ- ءنىڭ وسىنداي مادەني- ءبىلىم بەرۋ ورتالىقتارى قىتايدىڭ وڭتۇستىك- باتىس ۋنيۆەرسيتەتىندە، تۇركيانىڭ Nigde Omer Halisdemir ۋنيۆەرسيتەتىندە، وزبەكستاننىڭ فەرعانا مەملەكەتتىك ۋنيۆەرسيتەتىندە جۇمىس ىستەيدى.

بۇدان باسقا، ەۇۋ بريۋسسەل قالاسىندا (بەلگيا) ينتەرناتسيونالداندىرۋ جانە حالىقارالىق ىنتىماقتاستىقتى دامىتۋ ماسەلەلەرى جونىندەگى رەسمي وكىلدىگىن اشتى. ەۋروپالىق وداقتا ل. ن. گۋميلەۆ اتىنداعى ە ۇ ۋ كامپۋسىنىڭ اشىلۋى جوسپاردا بار»، - دەدى رەكتور.

م. اۋەزوۆ اتىنداعى وڭتۇستىك قازاقستان ۋنيۆەرسيتەتى قىتايدىڭ جوعارى وقۋ ورىندارىمەن سەرىكتەستىك قارىم- قاتىناس ورناتۋ جانە دامىتۋ بويىنشا بەلسەندى جۇمىس جۇرگىزىپ جاتىر. ق ر- نىڭ ق ح ر- داعى ەلشىلىگىنىڭ قولداۋىمەن م. اۋەزوۆ اتىنداعى وقۋ داليان شەت تىلدەر ۋنيۆەرسيتەتىنىڭ بازاسىندا قازاقستاندى زەرتتەۋ ورتالىعىن اشتى. وندا اۋەزوۆ ۋنيۆەرسيتەتىنىڭ وقىتۋشىلارى جۇمىس ىستەيدى. ولار نيەت بىلدىرۋشىلەرگە قازاق ءتىلىن ۇيرەتەدى، ولاردى قازاقتىڭ سالت- داستۇرلەرىمەن تانىستىرادى. اتالعان ورتالىق قازاقستان مەن قىتاي ستۋدەنتتەرى جانە وقىتۋشىلارى اراسىنداعى ءبىلىم بەرۋ، عىلىمي بايلانىستاردى كەڭەيتۋ بويىنشا دا ءىس- شارالار وتكىزەدى.

قازاق ءتىلى مەن مادەنيەتى ورتالىقتارى پولشاداعى يان اموس كومەنسكي ۋنيۆەرسيتەتىندە جانە وڭتۇستىك كورەياداعى Kyungdong University-دە جۇمىس ىستەيدى. ولار سەمەي قالاسىنىڭ شاكارىم اتىنداعى ۋنيۆەرسيتەتىنىڭ وسى شەتەلدىك جوعارى وقۋ ورىندارىمەن ىنتىماقتاستىعى اياسىندا اشىلدى. ق. جۇبانوۆ اتىنداعى اقتوبە وڭىرلىك ۋنيۆەرسيتەتى پولشانىڭ بىدگوش قالاسىندا شەتەلدىك ارىپتەس جوعارى وقۋ ورىندارىنىڭ جانە تۇركيانىڭ كاستامونۋ ۋنيۆەرسيتەتىنىڭ بازاسىندا «Qazaq eli» مادەني ورتالىقتارىن اشتى.