بۇل تۋرالى قالالىق پوليتسيا دەپارتامەنتىنىڭ رەسمي وكىلى دانيار ورالوۆ ءمالىم ەتتى، دەپ حابارلايدى قازاقپارات ءتىلشىسى.
«قالا قاۋىپسىزدىگىمەن قاتار ەلوردا ماڭايىنداعى تۇرعىن ءۇي الاپتارىنىڭ دا قاۋىپسىزدىگى دە نازاردا. وسى ورايدا كيرپيچنىي، يلينكا، قاراوتكەل سەكىلدى تۇرعىن ءۇي الاپتارىندا بەينەباقىلاۋ كامەراسىنىڭ سانىن ارتتىرا تۇسەتىن بولامىز. سونداي- اق، ولاردىڭ جۇمىس ىستەپ تۇرعاندىعى دا قاداعالانادى. جول كارتاسى اياسىندا قالا مەن ونىڭ ىرگەسىندەگى ەلدىمەكەندەردەگى بەينەباقىلاۋ كامەراسىنىڭ سانى كوبەيە تۇسپەك»، - دەدى دانيار ورال پوليتسيا دەپارتامەنتىندە وتكەن باسپا ءسوز ءماسليحاتىندا.
رەسمي وكىلدىڭ ايتۋىنشا، قوعام قاۋىپسىزدىگىن قامتاماسىز ەتۋ ەلوردالىق ءتارتىپ ساقشىلارىنىڭ ۇنەمى نازارىندا. ءوز كەزەگىندە «بايقوڭىر» اۋدانى پوليتسيا باسقارماسىنىڭ جەرگىلىكتى پوليتسيا قىزمەتى ءبولىمىنىڭ باسشىسى قايرات تولەپوۆ اۋداندى بەينەباقىلاۋ جۇيەسىمەن قامتۋ جۇمىسى تۋرالى ايتىپ بەردى.
«بايقوڭىر اۋدانىندا 446 كوپقاباتتى تۇرعىن ءۇي بار. ولاردىڭ 90 پايىزى بەينەباقىلاۋ كامەراسىمەن قامتىلعان. ىستەن شىققان بەينەباقىلاۋ كامەراسى انىقتالعان جاعدايدا جەرگىلىكتى اكىمدىك پەن پوليتسيا بولىمشەسىنە ولقىلىقتى جويۋ جونىندەگى حابار دەرەۋ جەتكىزىلەدى»، - دەيدى ءبولىم باسشىسى.
بۇعان دەيىن استانالىق پوليتسەيلەردىڭ تاۋلىك ىشىندە 100 گە جۋىق قىلمىستىڭ بەتىن اشقانىن حابارلاعان ەدىك.
سونداي- اق، باسپا ءسوز ءماسليحاتىندا 1 مىڭنان استام ەلوردا تۇرعىنىنا قۇقىقتىق كومەكتىڭ كورسەتىلگەنى ايتىلدى.
اۆتور: ءالي يبرايەۆ