تاڭەرتەڭنەن باستاپ مىڭنان استام دەلەگات پلەنارلىق وتىرىستارعا ۇلگەرۋ ءۇشىن ۇزىن- سونار كەزەكتە تۇر. ولاردىڭ كوپشىلىگى كوۆيد جۇقتىرماۋ ماقساتىندا بەتپەردە تاققان.
- سامميت ءوتىپ جاتقان كورمە ورتالىعىنىڭ اۋماعىندا ادام وتە كوپ. الەۋمەتتىك ارا- قاشىقتىقتى ساقتاۋ قيىن. ۇيىمداستىرۋشىلار شارا باستالعاننان كەيىن حالىقتى ىشكە كىرگىزۋدى توقتاتىپ تاستادى. ب ۇ ۇ وكىلدەرى مۇنى كوروناۆيرۋسقا بايلانىستى قابىلدانعان شەشىم دەپ ءتۇسىندىردى. بيلىك قاتاڭ سانيتارلىق تالاپتاردىڭ ساقتالىپ، ۇلى بريتانيادا ۆاكسينالاۋ ناۋقانىنىڭ وتە جوعارى دەڭگەيدە وتكىزىلگەنىنە قاراماستان، كونفەرەنسيا كوۆيد اۋرۋىنىڭ كەڭىنەن تارالۋىنا اسەر ەتۋى مۇمكىن ەكەندىگىن مويىندادى. عيماراتقا كىرە الماعان قاتىسۋشىلارعا شارانى ونلاين كورۋ ۇسىنىلدى.
حالىقتىڭ كوپشىلىگى ءۇندىستان پرەمەر- ءمينيسترى نارەندرا موديدىڭ مالىمدەمەسىن كۇتكەندەي بولدى. ويتكەنى ءۇندىستان - قىتاي، ا ق ش جانە ەۋرووداقتان كەيىن قورشاعان ورتانى ەڭ كوپ لاستايتىن ءتورتىنشى ەل.
نارەندرا مودي، ءۇندىستان پرەمەر- ءمينيسترى:
- مەن كليماتتىڭ وزگەرۋ پروبلەماسىنا وتە مۇقيات قارايمىن، ءبىراق ءۇندىستاننىڭ ەكونوميكالىق الەۋەتىنە نۇقسان كەلتىرگىم كەلمەيدى. ءبىز اۋانى لاستاۋدى 2050 -جىلعا قاراي ەمەس، 2070 -جىلعا قاراي نولگە جەتكىزۋگە ۋادە بەرەمىز. بۇل كونفەرەنسيانىڭ نەگىزگى ميسسياسىنا سايكەس كەلمەيتىنى راس، ءبىراق باسقا امال جوق.
ءدال وسى ساتتە كوشەدە كونفەرەنسيانىڭ ۇيىمداستىرىلۋىنا قارسىلىق بىلدىرۋشىلەردىڭ نارازىلىق اكتسياسى ءوتىپ جاتتى. شۆەد ەكو- بەلسەندىسى گرەتا تۋنبەرگ فورۋمنان كەيىن ەشتەڭە وزگەرمەيدى، بوس سوزدەن باتىل ارەكەتكە كوشەتىن ۋاقىت كەلدى دەپ مالىمدەدى.
سامميتتە ەستە قالارلىق ءساتتىڭ ءبىرى – ا ق ش پرەزيدەنتى دجو بايدەننىڭ سپيكەرلەردى كوزىن جۇمىپ تىڭداۋى بولدى. بۇل كورىنىس شامامەن 30 سەكۋندقا سوزىلدى. كەيبىرەۋلەر بايدەن ۇيىقتاپ قالدى دەپ ويلادى. بۇگىن ءسامميتتىڭ باستى سپيكەرلەرىنىڭ ءبىرى رەسەي پرەزيدەنتى ۆلاديمير پۋتين بولماق. ءبىراق ول ءوزى قاتىسپايدى. الدىن الا جازىلعان بايانداماسى جاريا ەتىلەدى. پۋتين ورماندى قورعاۋ جانە جەردى پايدالانۋ تۋرالى مەملەكەت پەن ۇكىمەت باسشىلارىنىڭ بىرلەسكەن دەكلاراتسياسى تۋرالى پىكىر بىلدىرمەك. قۇجاتقا الەمدەگى جالپى ورمان ايماعىنىڭ 85 پروتسەنتىن يەلەنەتىن 100-دەن استام ەل قول قويادى.
اۆتورى: عالىمجان قارامان ۇلى
www.24.kz