رەسمي وكىل پەنجىمدەگى جاپپاي توبەلەستە زارداپ شەككەن وقۋشىنىڭ قازىرگى جاعدايىن ايتتى

تالدىقورعان. قازاقپارات - الماتى وبلىسى پانفيلوۆ اۋدانىنىڭ پەنجىم اۋىلىندا وقۋشىلاردىڭ جاپپاي توبەلەسىنەن زارداپ شەككەن بالا جانساقتاۋ بولىمىنەن جالپى پالاتاعا اۋىستىرىلدى، دەپ حابارلايدى قازاقپارات ءتىلشىسى.

«2005 -جىلى تۋعان ناۋقاس جانساقتاۋ بولىمىنەن تراۆماتولوگيا بولىمشەسىنە اۋىستىرىلدى. ال 1967 -جىلى تۋعان ناۋقاس حيرۋرگيا بولىمشەسىندە ەم قابىلداپ جاتىر. قازىرگى تاڭدا ەكى ناۋقاستىڭ دا جاعدايى جاقسارىپ كەلەدى. دارىگەرلەر ولاردىڭ جاعدايىن ورتاشا اۋىرلىقتا دەپ باعالاپ وتىر. پاتسيەنتتەرگە بارلىق قاجەتتى مەديتسينالىق كومەك كورسەتىلۋدە»، - دەدى الماتى وبلىستىق دەنساۋلىق ساقتاۋ باسقارماسى باسپا ءسوز قىزمەتىنىڭ رەسمي وكىلى ءلايلىم اۋباكىروۆا.

ەسكە سالساق، 27-قازان كۇنى پانفيلوۆ اۋدانىنىڭ پەنجىم اۋىلىندا وقۋشىلار اراسىندا جاپپاي توبەلەس بولدى. بۇزاقىلار بىرنەشە ءۇي مەن كولىكتىڭ تەرەزەلەرىن سىندىردى.

اتالعان فاكتى بويىنشا ق ر ق ك 293-بابىنىڭ 2-بولىگى بويىنشا قىلمىستىق ءىس قوزعالدى. دارىگەرلەر زارداپ شەككەن بالانىڭ دەنساۋلىعى تۋرالى ايتتى. كەيىن پانفيلوۆ اۋدانىنىڭ اكىمى پەنجىم اۋىلىنىڭ تۇرعىندارىمەن كەزدەستى. اۋىلداعى ۇيلەردىڭ ماتەريالدىق شىعىندارى ەسەپتەلىپ جاتىر. قازىردىڭ وزىندە 30 دان استام ءۇيدىڭ تەرەزەلەرى تولىقتاي قالپىنا كەلتىرىلگەن.

اۆتور: سامال قابىشەۆا