گىر سپورتىمەن اينالىساتىن ايەل: ەرەن ەڭبەكتىڭ المايتىن قامالى جوق
جانى نازىك ايەلدىڭ اۋىر تەمىردى جۇلقا كوتەرىپ، بيىك بەلەستى باعىندىرۋى تاڭقالارلىق جايت. تاڭقالۋىمىزدىڭ تاعى ءبىر سەبەبى - 35 جاستاعى ايەل سپورتپەن اينالىسىپ قانا قويماي، ۇيىندەگى اتا- اجەسىنە قامقور بولىپ، 3 بالاسىن تاربيەلەپ، كاسىپورىندا جۇمىس ىستەپ تە ءجۇر.
بۇنىڭ بارىنە قالاي ۇلگەرەتىنىن ول قازاقپارات تىلشىسىنە سۇحبات بارىسىندا ايتىپ بەردى.
- گىر سپورتىمەن قالاي اينالىسا باستادىڭىز؟
- نەگىزىنەن ءوزىم بالا كۇننەن بەرى سپورتقا جاقىنمىن. جالپى وتباسىمىزبەن سپورتتى جانىمىزعا سەرىك ەتتىك دەسەم ارتىق بولماس. انام - جەڭىل اتلەتيكا نۇسقاۋشىسى، تۋعان اعام - بوكستان سپورت شەبەرى. ال گىر سپورتىمەن اينالىسا باستاعانىما 7 جىلداي بولدى. اۋەل باستا وڭايعا سوققان جوق. سوندا دا بەرىلمەۋگە بەل شەشتىم. العاشقى ناتيجەلەر بايقالعان سوڭ قولىمنان كەلەتىنىنە سەنىمىم ارتىپ، «نار تاۋەكەل!» دەپ جارىستارعا دا قاتىسا باستادىق.
- ەڭ العاش رەت قانداي جارىسقا قاتىستىڭىز؟
- شىنىمدى ايتسام، ناقتى قاي جىلى ەكەنىن ۇمىتىپ قالىپپىن. ايتەۋىر قالالىق دەڭگەيدە وتكەن جارىس بولاتىن. سول دودادا 2-ورىن الدىم. وسىدان كەيىن بىرنەشە جىل قاتارىنان وبلىستىق جانە قالالىق سايىستارعا قاتىسىپ جەڭىمپاز اتاندىم. ال وسى جىلدىڭ شىلدە ايىندا شىعىس قازاقستان وبلىسى ءشۇلبى كەنتىندە وتكەن رەسپۋبليكالىق جارىستا باق سىنادىم. وعان ەلىمىزدىڭ تۇكپىر- تۇكپىرىنەن مىقتى سپورتشىلار كەلدى. بارىمدى سالىپ ۇزدىكسىز جاتتىعىپ، كۇمىس مەدالدى قانجىعاما بايلادىم.
- اپتاسىنا نەشە كۇن، قانشا ساعاتتان دايىندىق جاسايسىز؟
- اپتا سايىن 3-4 رەت بىرنەشە ساعاتتان كوبىنەسە تۇنگى ۋاقىتتا دەنە شىنىقتىرۋ- ساۋىقتىرۋ كەشەنىنە بارىپ شۇعىلدانامىن. ال جارىس تاياعاندا كۇن سايىن قارا تەرگە مالىنىپ دايىندالامىن. مەنىڭ جاتتىقتىرۋشىم جوق. گىر سپورتىمەن اينالىساتىنداردان اقىل- كەڭەس سۇراپ، سول بويىنشا دايىندىق جاسايمىن. سەبەبى باپكەردىڭ جۇمىس كەستەسىنە يكەمدەلە المايمىن. ءۇي شارۋاسى، جۇمىس ورنىم بار دەگەندەي. بارىنە ۋاقىت تابۋعا تۋرا كەلەدى.
- سونىڭ بارىنە ۋاقىتتى قايدان تاباسىز سوندا؟
- مەن ءبىرىنشى كەزەكتە انامىن عوي. كۇيەۋىم ەكەۋىمىز 3 بالا تاربيەلەپ وتىرمىز. جان جارىم جەكە كومپانيادا جۇرگىزۋشى بولىپ جۇمىس ىستەيدى. ەكى ۇل، ءبىر قىزىمىز بار. ولاردىڭ ساباعىن قاراتىپ، ءۇي شارۋاسىمەن اينالىسىپ، تاماق پىسىرەمىن. قولىمىزدا ناعاشى اتا-اپام تۇرادى. وزدىگىنەن ءجۇرىپ- تۇرا المايتىن ولار كوپ كۇتىمدى قاجەت ەتەدى. ونىڭ ۇستىنە كۇنكورىس قامى ءۇشىن جۇمىس تا ىستەيمىن. «كازتسينك» كومپانياسى ريددەر كەن بايىتۋ كومبيناتى تەحنيكالىق قۇجاتتاماسىنىڭ مامانىمىن. بالالارىمدى زالعا بىرگە الىپ كەتەتىن كەزدەر از ەمەس. ءبىر تۇسىنگەنىم، ادام كوڭىلى قالاسا سۇيىكتى ىسىنە ءبارىبىر ۋاقىت تابادى ەكەن. ەرەن ەڭبەكتىڭ المايتىن قامالى جوق ەكەندىگىنە كوزىم جەتتى.
- الەم چەمپيوناتىنان جۇلدە الامىن دەپ ويلادىڭىز با؟
- نەگىزى باسىندا سول جارىسقا بارمايمىن دەپ ويلادىم. ورىن الامىن دەگەن سەنىمنىڭ جوقتىعىنان ەمەس، ۋاقىت جەتپەي قالا ما دەگەن ۋايىمنان. سول كەزدە جولداسىم كوپ قولداۋ ءبىلدىرىپ، «باعىڭدى سىناپ كور» دەدى. تاعى دا «نار تاۋەكەل!» دەدىك. ءبىراق جول شىعىنىنا اقشا جەتپەدى. ءسويتىپ، جۇمىستاعى باسشىلىققا حات جازىپ، قارجىلاي قولداۋ كورسەتۋىن سۇرادىم. ولار بەتىمدى قاقپاي، 1 ميلليون 800 مىڭ تەڭگە ءبولدى. سول ءۇشىن كومپانيا تىزگىنىندەگى ازاماتتارعا مىڭ العىس! سونداي- اق دەمەۋشىلىك تانىتقان ريددەر قالاسىنداعى الەكسەي بوبوشكو ەسىمدى كاسىپكەرگە دە راحمەت ايتقىم كەلەدى. كۇيەۋىم جۇمىستان سۇرانىپ، ءبىر اپتا بويى ۇيدە بولدى. وسى جاندار بولماعاندا جارىسقا قاتىسا الماس ەدىم. ۆەنگريانىڭ استاناسى بۋداپەشت قالاسىندا جەر جاھاننىڭ جان جاعىنان كىل جۇيرىكتەر جينالىپتى. 58 كەلىگە دەيىنگى سالماقتاعى ەكى كاتەگوريادا، اتاپ ايتقاندا اۋەسقويلار مەن ارداگەرلەر ساناتىندا دوداعا ءتۇستىم. 16 كەلىلىك گىردى 10 مينۋتتا 160 رەت جۇلقا كوتەردىم. وسىلايشا، ەكى كۇمىس مەدال يەلەندىم. قۋانىشىمدا شەك بولمادى! قانشاما ۋاقىت، مول ەڭبەك پەن اشى تەر زايا كەتپەدى. ريددەرگە قايتا ورالعاندا وتباسىم، ارىپتەستەرىم، كورشى- قولاڭ قۇشاق جايا قارسى الدى. اتا-اپام كوزدەرىنە جاس الىپ، ريزاشىلىعىن ءبىلدىردى.
- ايەل ادامعا ۇنەمى گىر كوتەرۋ وڭاي ەمەس شىعار؟
- ارينە. سپورتتىڭ بۇل ءتۇرى - اۋىر تەمىردى جاي عانا كوتەرۋ ەمەس، ونىڭ وزىندىك قىر- سىرى، تەحنيكاسى بار. ايەل ادامعا مۇنداي فيزيكالىق جاتتىعۋلار قيىنعا سوعادى. سالماعى اۋىر جاندارعا ءسال وڭايلاۋ بولۋى مۇمكىن. ال مەن سياقتى جەڭىل سالماقتاعى ايەلدەرگە وتە كۇردەلى. تامىرلارىم شىعىپ، ەتىم ءىسىپ، قولىمنىڭ بۋىندارى سىرقىرايدى. ءبىراق جەتىستىككە جەتۋ ءۇشىن سونىڭ بارىنە شىداۋعا تۋرا كەلەدى.
- اڭگىمەڭىزگە كوپ راحمەت!
اۆتور: تالعاتجان مۇحامەتبەك ۇلى