قاراعاندىلىق دارىگەرلەر قايتا ۆاكسيناتسيادان كىمدەر جانە قاشان ءوتۋ كەرەكتىگىن ايتتى

قاراعاندى. قازاقپارات - قاراشانىڭ ءۇشىنشى ونكۇندىگىندە قاراعاندى وبلىسىندا كوروناۆيرۋس ينفەكسياسىنا قارسى رەۆاكسيناتسيا باستالادى. دارىگەرلەر كروسس- رەۆاكسيناتسيادان ءوتۋدى ۇسىنادى، دەپ حابارلايدى قازاقپارات ءتىلشىسى.

رەۆاكسيناتسيانىڭ ارتىقشىلىعى نەدە جانە نەلىكتەن قايتا يممۋنداۋ نەلىكتەن قاجەت ەكەنى تۋرالى ينفەكسيونيست دارىگەر، مەديتسينا عىلىمدارىنىڭ دوكتورى روزاليا بەگايداروۆا وڭىرلىك كوممۋنيكاتسيالار قىزمەتى الاڭىندا وتكەن ونلاين-بريفينگتە ايتىپ بەردى. كوروناۆيرۋس پاندەمياسى بۇكىل الەمدە تاراپ جاتىر. بارلىق ەلدەردە جاڭا شتامدار پايدا بولۋدا. قايتا ەگۋ اعزانى قورعاۋ ءۇشىن انتيدەنەلەردىڭ جەتكىلىكتى دەڭگەيىنىڭ قالىپتاسۋىنا مۇمكىندىك بەرەدى. قازاقستاندا رەۆاكسيناتسيا ەرىكتى نەگىزدە وتەدى. بارلىق ەگۋلەر تەگىن.

«كروسس- ۆاكسيناتسيا - بۇل ادامعا بۇرىن الماعان پرەپاراتتى ەگۋدى بىلدىرەدى. ەگەر ادام الدىمەن «سپۋتنيك V» ۆەكتورلىق ۆاكسيناسىن السا، وندا بەلسەندى ەمەس - QazVac، Pfizer، Hayat-Vax جانە ت. ب. قايتا ۆاكسيناتسيادان ءوتۋى قاجەت»، - دەپ ءتۇسىندىردى روزاليا بەگايداروۆا. قايتا يممۋنداۋ مەرزىمى ەكى دوزانى العاننان كەيىن التى ايدان توعىز ايعا دەيىن سوزىلادى.

ونىڭ ۇزاقتىعى ءبىرىنشى رەت الىنعان ۆاكسيناعا بايلانىستى.

«سپۋتنيك V» - دەن كەيىن توعىز اي كۇتۋ كەرەك. باسقا جاعدايلاردا - التى اي. رەۆاكسيناتسيا ەڭ الدىمەن كوروناۆيرۋس جۇقتىرۋ قاۋپى جوعارى ادامدارعا ۇسىنىلادى. ول دارىگەرلەر، پەداگوگتار، قۇقىق قورعاۋ قۇرىلىمدارىنىڭ قىزمەتكەرلەرى جانە قىزمەت كورسەتۋ سالاسىندا جۇمىس ىستەيتىندەر. رەۆاكسيناتسيا اسىرەسە 60 جاستان اسقان ادامدارعا كورسەتىلگەن. قارسى كورسەتكىش - بۇل العاشقى ۆاكسيناتسيادان كەيىن پايدا بولعان كۇشتى اللەرگيالىق رەاكسيا.