ادام قۇقىقتارى جونىندەگى ۋاكىلدىڭ الەۋەتىن نىعايتۋعا مۇمكىندىك جاسالادى - ءماجىلىس
بۇگىن ماجىلىستەگى «ادام قۇقىقتارى جونىندەگى ۋاكىلدىڭ قۇقىقتىق مارتەبەسى جانە تاۋەلسىزدىگىنىڭ كەپىلدىكتەرى» تاقىرىبىنداعى دوڭگەلەك ۇستەل وتىرىسىندا ءماجىلىس ءتوراعاسىنىڭ ورىنباسارى بالايم كەسەبايەۆا وسىلاي ايتتى، دەپ حابارلايدى قازاقپارات ءتىلشىسى.
«2021-جىلعى 15- قاڭتاردا مەملەكەت باسشىسى قاسىم-جومارت توقايەۆ جەتىنشى سايلانعان پارلامەنتتىڭ ءبىرىنشى سەسسياسىنىڭ اشىلۋىندا سويلەگەن سوزىندە ادام قۇقىقتارىن قورعاۋ مەملەكەتتىك ساياساتتىڭ ماڭىزدى باسىمدىعى ەكەنىن تاعى دا ەسكە سالىپ ءوتتى. وسى تۇرعىدا ول جۇمىس ىستەپ تۇرعان ومبۋدسمەن ينستيتۋتى ءالى دە ءوزىنىڭ الەۋەتىن تولىق اشپاعانىن اتاپ ءوتىپ، ارنايى زاڭ قابىلداۋدى جانە ادام قۇقىقتارى جونىندەگى ۋاكىلدىڭ اپپاراتىن، ءتىپتى ونىڭ وڭىرلىك وكىلدىكتەرىن قۇرۋعا دەيىن نىعايتۋدى تاپسىردى. ءبىرىنشى كەزەكتە ءتيىستى زاڭ جوبالارىنىڭ توپتاماسىن ازىرلەۋ ارقىلى وسى تاپسىرمانى ىسكە اسىرۋ جونىندە باستاما جاساعان ق ر پارلامەنتىنىڭ دەپۋتاتتارىنا، سونداي-اق زاڭناما جانە سوت-قۇقىقتىق رەفورما كوميتەتىنە مۇشە دەپۋتاتتارعا جانە ادام قۇقىقتارى جونىندەگى ۇلتتىق ورتالىققا وسىنداي وزەكتى تاقىرىپقا ارنالعان ءىس-شارانى ۇيىمداستىرعانى ءۇشىن العىسىمدى بىلدىرگىم كەلەدى»، - دەدى ب. كەسەبايەۆا.
ونىڭ ايتۋىنشا، ادام قۇقىقتارى جونىندەگى ۋاكىل ينستيتۋتى كونستيتۋتسيادا كەپىلدىك بەرىلگەن ادام مەن ازاماتتىڭ نەگىزگى قۇقىقتارى مەن بوستاندىقتارىن قورعاۋمەن تىكەلەي بايلانىستى بولعاندىقتان، بۇل ءاردايىم وزەكتى. ادام مەن ازاماتتىڭ بۇزىلعان قۇقىقتارىن قالپىنا كەلتىرۋ ءدال وسى ادام قۇقىقتارى جونىندەگى ۋاكىل ينستيتۋتىنىڭ قۇقىقتىق مارتەبەسىن، قىزمەتىنىڭ قاعيداتتارى مەن كەپىلدىكتەرىن زاڭنامالىق دەڭگەيدە ناقتى ايقىنداۋ ارقىلى ونىڭ ودان ءارى دامۋىنا بايلانىستى بولادى. سوندىقتان بۇل ينستيتۋتتى دامىتۋدىڭ ماڭىزدىلىعى مەن قاجەتتىلىگى داۋسىز.
«قازىرگى ۋاقىتتا زاڭناما جانە سوت-قۇقىقتىق رەفورما كوميتەتىندە «قازاقستان رەسپۋبليكاسىنداعى ادام قۇقىقتارى جونىندەگى ۋاكىل تۋرالى» زاڭ جوباسى قارالىپ جاتىر. نەگىزگى زاڭ جوباسىن ىسكە اسىرۋ ءۇشىن ازاماتتىق پروتسەستىك، قىلمىستىق پروتسەستىك، اكىمشىلىك راسىمدىك-پروتسەستىك كودەكستەرىنە، اكىمشىلىك قۇقىق بۇزۋشىلىق تۋرالى كودەكسكە، بيۋجەت جانە سالىق كودەكستەرىنە تۇزەتۋلەر ازىرلەندى. زاڭ جوبالارىنا پارلامەنت دەپۋتاتتارى ادام مەن ازاماتتىڭ قۇقىقتارى مەن بوستاندىقتارىن قورعاۋ سالاسىنداعى زاڭنامانى جەتىلدىرۋ ماقساتىندا باستاما جاسادى. ولار ادام قۇقىقتارى جونىندەگى ۋاكىل مەن ونىڭ وڭىردەگى وكىلىنىڭ مارتەبەسىن، ولاردىڭ وكىلەتتىكتەرىن، لاۋازىمعا سايلاۋ جانە لاۋازىمنان بوساتۋ ءتارتىبىن، قىزمەتىنىڭ قاعيداتتارى مەن كەپىلدىكتەرىن، ادام قۇقىقتارى جونىندەگى ۇلتتىق ورتالىقتىڭ نەگىزگى فۋنكتسيالارىن جانە قارجىلاندىرۋ كوزدەرىن رەتتەيدى»، - دەدى دەپۋتات.
زاڭ جوبالارىنىڭ ماقساتى - ادام مەن ازاماتتىڭ قۇقىقتارىن سوتتان تىس قورعاۋ كەپىلدىكتەرىن ورىنداۋدىڭ زاڭنامالىق نەگىزىن قۇرۋعا ۇمتىلۋ.
«بىرىككەن ۇلتتار ۇيىمىنىڭ قاعيداتتارى مەن ۇسىنىمدارىنا سايكەس كەلەتىن ارنايى زاڭنىڭ قابىلدانۋى ادام قۇقىقتارى جونىندەگى ۋاكىلگە قۇقىق قورعاۋ راسىمدەرىنە تولىققاندى قاتىسۋعا مۇمكىندىك بەرەدى. ۇلتتىق قۇقىق قورعاۋ مەكەمەلەرىن نىعايتۋدىڭ پاريج جانە ۆەنەتسيا قاعيداتتارىنىڭ ۇسىنىمدارى نەگىزگى جانە ىلەسپە زاڭ جوبالارىن ازىرلەۋگە نەگىز ەتىپ الىندى.
ناقتى وكىلەتتىكتەر مەن ولاردى ىسكە اسىرۋ ولشەمدەرىن ايقىنداۋ، زاڭ دەڭگەيىندە كانديداتتارعا قويىلاتىن تالاپتاردى، ونىڭ قىزمەتىنىڭ نەگىزگى قاعيداتتارىن بەكىتۋ ادام قۇقىقتارى جونىندەگى ۋاكىلدىڭ الەۋەتىن نىعايتۋعا مۇمكىندىك بەرەدى. ەڭ الدىمەن، بۇل - ادام قۇقىقتارى مەن بوستاندىقتارىنىڭ مۇددەسى ءۇشىن زاڭدىلىق، وبەكتيۆتىلىك جانە ادىلدىك، اشىقتىق، تاۋەلسىزدىك، جاۋاپكەرشىلىك.
بۇدان بۇرىن حابارلانعانداي، وسى اپتادا ءماجىلىستىڭ جالپى وتىرىسىندا «قازاقستان رەسپۋبليكاسىنداعى ادام قۇقىقتارى جونىندەگى ۋاكىل تۋرالى» زاڭ جوباسى ءبىرىنشى وقىلىمدا ماقۇلداندى.