ەلوردادا حالىقارالىق تۇركى اكادەمياسىنىڭ جاڭا عيماراتى اشىلدى
جاڭا عيماراتتىڭ اشىلۋ سالتاناتىنا مەملەكەتتىك حاتشى قىرىمبەك كوشەربايەۆ باستاعان ءبىرقاتار زيالى قاۋىم وكىلدەرى قاتىستى.
«ەلباسى نۇرسۇلتان نازاربايەۆتىڭ باستاماسىمەن اشىلعان تۇركى اكادەمياسى بۇگىندە تۇركىتىلدەس باۋىرلاردى رۋحاني بايلانىستىراتىن بەدەلدى حالىقارالىق ۇيىمعا اينالىپ وتىر. مەملەكەت باسشىسى قاسىم- جومارت توقايەۆتىڭ قولداۋىمەن بۇگىن مىنە اكادەميانىڭ جاڭا قونىسقا كوشۋ ساتىنە كۋا بولىپ وتىرمىز. جاڭا عيمارات بارشاعا قۇتتى بولسىن! حالىقارالىق تۇركى اكادەمياسى تۋىسقان حالىقتاردىڭ ءتىلى، ادەبيەتى، مادەنيەتىنىڭ زامان تالابىنا ساي جاڭعىرۋىنا ۇلكەن ۇلەس قوسىپ كەلەدى. وسى ساتتە تۇرىك باۋىرلارىمىزدى بۇگىنگى ۇلتتىق مەرەكەسىمەن قۇتتىقتايمىز»، - دەدى قىرىمبەك كوشەربايەۆ ايتۋلى شارادا.
سونداي- اق، اكادەميانىڭ جاڭا عيماراتىندا مۋزەي مەن كىتاپحانا بار. وندا تۇركى الەمىنە قاتىستى جادىگەرلەر مەن ادەبي تۋىندىلار قويىلعان.
«2009 -جىلى ەلباسىنىڭ باستاماسىمەن حالىقارالىق تۇركى اكادەمياسى قۇرىلىپ، 2010 -جىلى اكادەمياعا ەلورداداعى بەيبىتشىلىك جانە كەلىسىم سارايىنىڭ ىشىنەن بولەك كەڭسە بەرىلدى. بۇگىن مىنە مەملەكەت باسشىسىنىڭ تاپسىرماسىنا ساي اكادەمياعا بولەك عيمارات بەرىلىپ وتىر. جاڭا عيماراتىمىز ەكى بولىكتەن تۇرادى، ءبىر بولىگى مۋزەي جانە كىتاپحانا. ەكىنشى جاعىندا قىزمەتكەرلەرگە ارنالعان جۇمىس كابينەتتەرى. مۋزەيدىڭ ءوزى 3 بولىكتەن تۇرادى، العاشقى ءبولىم تۇركى حالقىنىڭ ەتنوگرافياسىنا ارنالعان، ەكىنشى ءبولىم جالپى تۇركولوگياعا ارنالعان جانە اكادەمياعا سىيعا تارتىلعان سىي- سىياپاتتار ءبولىمى بار»، - دەدى حالىقارالىق تۇركى اكادەمياسىنىڭ پرەزيدەنتى دارحان قىدىرالى.
ودان بولەك، اكادەميا باسشىسى جاڭا عيماراتتا الداعى ۋاقىتتا ءتۇرلى ءىس- شارالاردىڭ ۇيىمداستىرىلاتىنىن تىلگە تيەك ەتتى. وسى ورايدا بۇگىن اكادەميا قابىرعاسىندا ەلىمىزدەن شىققان تۇڭعىش انتروپولوگ، قازاق انتروپولوگياسىنىڭ نەگىزىن سالۋشى ورازاق سماعۇلوۆتىڭ «قازاق حالقى مەن ونىڭ اتا تەگىنە وراي انتروپولوگيالىق وچەرەكتەر» اتتى جاڭا كىتابى تانىستىرىلدى.
ايتا كەتەيىك، تۇركى اكادەمياسىنىڭ جاڭا قونىسى ەلوردانىڭ «ديپلوماتتار قالاشىعى» تۇرعىن ءۇي الابىنان اشىلىپ وتىر.