شىعىس قازاقستانعا زىمىران «قۇلادى» - فوتو
ش ق و توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، ارنايى تاكتيكالىق وقۋ- جاتتىعۋ گلۋبوكوە اۋدانىندا ءوتتى.
جوسپار بويىنشا ت ج د كەزەكشىسىنە «بايقوڭىر» عارىش ايلاعىنان ۇشقان زىمىران تاسىعىش فراگمەنتتەرىنىڭ ءوڭىر اۋماعىنا قۇلاعانى تۋرالى حابار كەلىپ ءتۇستى. سول جەرگە اپاتتى جەدەل جويۋ ءۇشىن ازاماتتىق قورعاۋ قىزمەتتەرى كەلىپ جەتتى. سونىمەن قاتار وبلىستىق جانە اۋداندىق اكىمدىكتە توتەنشە جاعدايلار جونىندەگى كوميسسيالاردىڭ شۇعىل وتىرىسى وتكىزىلدى.
قوعامدىق ءتارتىپتى قورعاۋ قىزمەتى زىمىران تاسىعىشتىڭ قۇلاعان جەرىن تۇگەل قورشاپ تاستادى. ت ج ايماعىنداعى اۋىل تۇرعىندارى قالىپتاسقان جاعداي تۋرالى سيگنالدىق- داۋىس قۇرىلعىلارىمەن جابدىقتالعان اۆتوكولىكتەردىڭ كومەگىمەن حاباردار ەتىلدى. قۇتقارۋشىلار تۇرعىندار مەن جانۋارلاردى وقيعا ورنىنان ەۆاكۋاتسيالادى. تارحانكا اۋىلىنىڭ حالقى ورنالاستىرۋ پۋنكتىنە جەتكىزىلدى. وندا ازاماتتارعا ءۇش ۋاقىت ىستىق تاماق پەن ءبىرىنشى كەزەكتە قاجەتتى زاتتار بەرىلدى.
ەۆاكۋاتسيالانعان حالىقپەن پسيحولوگتار جۇمىس جۇرگىزدى. ءورت سوندىرۋشىلەر قىزىل جالىن وشاقتارىن تولىقتاي اۋىزدىقتادى. جەرگىلىكتى اتقارۋشى ورگان وكىلدەرى ت ج ايماعىندا حيميالىق زاقىمدانۋ دەڭگەيىن انىقتاۋ جانە اپات اۋماعىن قالپىنا كەلتىرۋ جۇمىستارىن ۇيىمداستىردى.
«تاكتيكالىق ارنايى وقۋ-جاتتىعۋعا جەكە قۇرامنان 30 ادام مەن 10 تەحنيكا جۇمىلدىرىلعان. مۇنداعى باستى ماقساتىمىز - زىمىران تاسىعىشتان بولعان توتەنشە جاعدايدىڭ سالدارىن جويۋعا ازاماتتىق قورعاۋ قىزمەتتەرىنىڭ دەڭگەيىن ارتتىرۋ»، - دەيدى وبلىستىق ت ج د باستىعىنىڭ ورىنباسارى دميتري تيتوۆ.
اۆتور: تالعاتجان مۇحامەتبەك ۇلى