وسكەمەندە باسى جارىلعان ەر ادامنىڭ مۇردەسى تابىلدى
11:40, 29 - قازان 2021
وسكەمەن. قازاقپارات - وسكەمەن قالاسىندا باسى جارىلعان ەر ادامنىڭ دەنەسى تابىلدى، دەپ حابارلايدى قازاقپارات ءتىلشىسى.
ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، ءمايىت كەشە قالاداعى شاشتارازدىڭ ءبىرىنىڭ ماڭىنان تابىلعان.
«102» جەدەل ارناسىنا حابارلاسقان قالا تۇرعىنى باسى جارىلعان ەر ادامنىڭ مۇردەسى جاتقانىن جەتكىزدى. وقيعا ورنىنا پوليتسيا قىزمەتكەرلەرى دەرەۋ كەلىپ جەتتى. كوپ ۇزاماي مارقۇمنىڭ كىم ەكەندىگى بەلگىلى بولدى»، - دەپ حابارلادى ۆەدومستۆو وكىلدەرى.
52 جاستاعى ازاماتتىڭ قاتتى سوققىدان كوز جۇمعانى انىقتالعان. قازىرگى ۋاقىتتا ءتارتىپ ساقشىلارى كۇدىكتىنى قولعا ءتۇسىردى. اتالعان فاكتى بويىنشا ق ر ق ك-نىڭ 99-بابىمەن (ادام ءولتىرۋ) سوتقا دەيىنگى تەرگەۋ امالدارى باستالدى. ءتيىستى سوت-مەديتسينالىق ساراپتامالار تاعايىندالعان.